Оны жаңғыртуға облыстық бюджеттен 320 миллион теңге қаражат бөлінді. Облыстық полиция департаментінің ақпараты бойынша жедел басқару орталығы іске қосылғаннан бастап 77 бейнебақылау камерасы мен ауданның аса қарқынды және стратегиялық маңызды нүктелеріне орнатылған 5 жылдамдық өлшегіш камерасы жұмыс істей бастады.
Жаңа жүйе 24/7 режимінде көшелердегі жағдайды бақылауға, бұзушылықтарды дер кезінде анықтауға және оқиғаларға жедел ден қоюға мүмкіндік береді. Орталықты құру «ақылды полиция» тұжырымдамасын іске асырудағы маңызды қадам болды. Онда заманауи технологиялар азаматтардың қауіпсіздігі мен тыныштығын қамтамасыз етуге жұмыс істейді.
Енді құқық қорғау қызметкерлері нақты уақыт режимінде кезекші нарядтардың іс-қимылын үйлестіріп, бірден шешім қабылдай алады. Яғни, бұл құқықбұзушылықтың алдын алуға және аудан тұрғындарының тыныштығын қамтамасыз етуге көмектеседі.
– Қауіпсіздік – азаматтардың тұрақтылығы мен сенімінің негізі. Цифрлық технологияларды енгізудің арқасында аудан құқықтық тәртіп пен қоғамдық бақылауды қамтамасыз етудің жаңа деңгейіне көшті, – дейді облыстық полиция департаменті бастығының орынбасары Әлімбет Смайлов.
Іс-шараға қатысқан көпшіліктің айтуынша, жедел басқару шағын орталығы – бұл жай ғана техникалық нысан емес, тұрғындардың қорғалуы мен сенімділігінің жаңа символы. Сондай-ақ, әр азаматтың өмірі мен мүлкі және тыныштығының кепілі болмақ.
Айгүл БАЙБОСЫНОВА
