Ата заң жобасында дәстүрлі отбасылық құндылықтарды қорғауға да ерекше көңіл бөлінген. Конституция некені ер мен әйелдің мемлекетте ресми тіркелген ерікті және тең құқықты одағы ретінде бекітеді. «Әділетті және прогрессивті Қазақстанның Халықтық Конституциясы үшін!» облыстық коалиция өкілдері Нұрбек Құдайберген, Асхат Досмұхамбетов және Салтанат Тенистанова Талдықорған агро-техникалық колледжінің ұжымы және студенттерімен кездесуі дәл осындай тұщымды оймен басталды.
Іс-шарада коалиция өкілдері Жаңа Конституциядағы жаңашылдықтар мен уақыт үдерісі тудырған оң өзгерістер турасында таразылады. Айтуларынша, қоғам һәм мемлекеттің басты құндылығы – адам және оның құқығы, денсаулығы болып нығырлай бекітіліпті.
Спикер Нұрбек Құдайберген жаңа жобада әділетті қоғам құру қағидаттары айқын көрініс тапқанын атап өтті. Оның айтуынша, отыз жылда әлем өзгерді, қоғам өзгерді. Жаңа сұраныстар, жаңа талаптар, жаңа құндылықтар пайда болды. Кейбір мәселелерді қоғам 30 жыл бұрынғыдай емес, қазір мүлдем басқаша қабылдайды.
– Құжатта әрбір азаматтың құқығы мен бостандығын қорғаудың, заң алдындағы теңдіктің, білім алу құқығының, денсаулықты қорғаудың, әлеуметтік қолдау мен лайықты өмір сүру деңгейінің негізгі қағидаттарын бекіту ерекше маңызға ие. Яғни, қоғамның әлеуметтік тұрақтылығы мен отбасының берекесін құрайтын басты құндылықтар қамтылған, – деді спикер.
Мұнан соң реформалар аясында өкілді органдардың рөлі артып, қоғамдық бақылау тетіктері күшейетінін сөз етті. Оның пікірінше, бұл өзгерістер азаматтардың шешім қабылдау процестеріне қатысу мүмкіндігін кеңейтіп, мемлекеттік басқару жүйесінің тиімділігі мен ашықтығын арттыруға ықпал етеді.
Іс-шараға қатысушылар тарапынан қойылған әлеуметтік, құқықтық және экономикалық бағыттағы сауалдарға жан-жақты жауап беріліп, ашық диалогтың маңыздылығы ерекше атап өтілді.
«ЖЕТІСУ-АҚПАРАТ»
