Алматыда қала тұрғындарын қорқынышта ұстаған жасөспірім қыздар анықталды. Полиция олардың Тәжікстан азаматтары екенін хабарлап, қазіргі уақытта елден шығару мәселесін қарастыруда, – деп хабарлайды 7-su.kz ақпараттық порталы.
Соңғы күндері әлеуметтік желілерде бір топ жасөспірім қыздардың агрессивті әрекеттері бейнеленген видеолар тараған. Кадрларда олар қала орталығында өтіп бара жатқан адамдарға тиісіп, ақша сұрап, бас тартқан жағдайда тас лақтырып, тіпті төбелес шығаратыны көрінеді. Кейбір тұрғындардың жеке заттары да тартып алынған.
Полиция күдікті жасөспірімдерді анықтап, ұстады. Белгілі болғандай, олар Тәжікстан Республикасының азаматтары. Барлығы полиция бөлімшелеріне жеткізіліп, кейін Кәмелетке толмағандарды бейімдеу орталығына орналастырылды.
«Қалалық полиция департаментінің мәліметінше, Медеу және Алмалы аудандарының қызметкерлері арнайы тексеріс жүргізді. Қазіргі уақытта жасөспірімдермен профилактикалық жұмыстар атқарылуда. Оқиғаға байланысты олардың ата-аналары да жауапқа тартылды. Олар балаларды дұрыс тәрбиелемегені үшін әкімшілік жауапкершілікке алынған. Құқық қорғау органдары әрбір дерек бойынша тексерісті жалғастыруда. Сонымен қатар, жасөспірімдерді Қазақстан аумағынан шығару мәселесі де қарастырылуда», – деп хабарлады полиция.
