Талдықорғанда жасөспірімдерге құрмет пен заңды ұстанудың маңызы түсіндірілді, деп хабарлайды Polisia.kz.
Талдықорған қаласындағы Жастарға қызмет көрсету орталығында Жетісу облысы полиция департаментінің өкілдері мен мектептердің «Жас сақшы» сыныптарының кадеттері арасында танымдық кездесу өтті. Іс-шара ашық диалог форматында ұйымдастырылып, жасөспірімдер өздерін толғандырған мәселелер бойынша еркін пікір алмасып, кәсіби мамандардан тікелей жауап алды.
Кездесу барысында жастар ортасындағы өзекті тақырыптар – буллинг, қорқытып ақша алу, агрессия, кәмелетке толмағандар арасындағы құқықбұзушылықтар кеңінен талқыланды. Оқушылар тек тыңдап қана қоймай, пікірталасқа белсенді қатысып, мектеп өмірінен нақты мысалдар келтірді және шешу жолдарын бірлесе іздеді.
Жетісу облысы полиция департаменті қоғамдық қауіпсіздік басқармасының бастығы қатысушыларға сөз сөйлей отырып, мұндай кездесулердің басты мақсаты – жастар мен полиция арасындағы сенімді нығайту, құқықтық сауаттылықты арттыру және әр азаматтың өз іс-әрекетіне саналы көзқарасын қалыптастыру екенін атап өтті.
– Құрмет, жауапкершілік және өзара көмек – жастар арасындағы қауіпсіз әрі достық ахуалдың негізі. Әрқайсыңыз есте сақтаңыздар: ізгілік пен әділдік өзіңнен басталады, – деді басқарма басшысы.
Полицейлер қатысушыларға зорлық-зомбылық пен буллингке бейжай қарамаудың маңыздылығын еске салып, кәмелетке толмағандардың қылмыстық және әкімшілік жауапкершілігі туралы жан-жақты түсіндірді. Сонымен қатар, заңды бір рет бұзудың өзі адамның болашағына, беделіне және қоғамдағы орнына әсер етуі мүмкін екені айтылды.
Мұндай кездесулер жасөспірімдерге заңның негізгі мәнін – тыйым емес, қорғау құралы, ал полицияның басты міндетін – бақылау емес, қолдау көрсету екенін ұғынуға мүмкіндік береді.
Кездесу соңында кадеттер мен оқушылар ұйымдастырушыларға алғыстарын білдіріп, осындай ашық форматтағы диалогтардың өздерін естілген әрі ертеңгі күнге сенімді сезінуге жол ашатынын атап өтті.
