Жетісу өңірінде 19 жастағы бойжеткен мен оның 41 жастағы анасы ірі көлемде қаражат талап етті деген күдікке ілінді, – деп хабарлайды 7-su.kz ақпараттық порталы.
Көксу ауданында орын алған бұл оқиға қоғам арасында үлкен талқылау тудырды. Әлеуметтік желілерде күдіктілердің туыстары наразылық білдіріп, сегіз айлық сәбидің анасыз қалғанын айтып, бейнежазба жариялады. Алайда заң талаптары мен құқықтық нормалар кез келген даулы мәселені тек сот залында шешуді міндеттейді.
Күдіктілердің туыстары таратқан мәліметке сүйенсек, жас ана баласының әкесімен материалдық көмек алу мақсатында кездескен. Олардың уәжінше, ер адам 25 млн теңге көлемінде көмек беруге өз еркімен уәде еткен. Бірақ кездесу орнында құқық қорғау органдарының қызметкерлері жедел әрекет етіп, анасы мен қызын қолға түсірді.
Полиция департаменті берген ресми ақпаратқа сәйкес, бұл жағдай аса ірі көлемдегі бопсалау фактісі ретінде тіркелді. Жедел-іздестіру шаралары барысында екі әйел қылмыстық жауапкершілікке тартпау үшін 25 млн теңге ақшаны алу сәтінде ұсталған. Қазіргі уақытта екі азамат та уақытша ұстау изоляторына қамалды. Оларға қатысты бұлтартпау шарасын заң аясында сот анықтайды.
