21 жастағы жігітті аяусыз пышақтаған 17 жастағы оқушыға сот үкімі шықты. Ол ҚР Қылмыстық кодексінің «Денсаулыққа қасақана ауыр зиян келтіру» бабымен кінәлі деп танылып, төрт жылға бас бостандығынан айырылды. Бұл туралы 7-su.kz ақпараттық порталы 31-арнаның «Информбюро» бағдарламасына сілтеме жасап хабарлайды.
Оқиға биыл қыстың басында көпқабатты үйдің ауласында болған. Тергеу дерегінше, 17 жастағы жасөспірім өзінен төрт жас үлкен Жасұлан Нұрлановқа бірнеше мәрте пышақ сұққан. Жәбірленушінің жүрек тұсы мен мойын тұсына төрт рет соққы жасалған. Кейін айыпталушы қасындағы адамдарымен бірге қансыраған жігітті сүйреп әкеліп, аязды күні далаға тастап кеткен. Абырой болғанда, сол маңдағы тұрғындар дер кезінде жедел жәрдем шақырып, жәбірленушінің өмірін сақтап қалды.
Сот барысында жасөспірімнің мұндай әрекетке не үшін барғаны анықталмаған.
Жәбірленушінің туыстары үкіммен келіспей отыр. Олардың айтуынша, бұл іс «Адам өлтіруге оқталу» бабы бойынша қаралуы тиіс еді.
Салтанат Барысбаева, жәбірленушінің туысы:
«Біз бұл үкіммен түбегейлі келіспейміз. Істе кісі өлтіруге оқталудың барлық белгілері бар. Жоғарғы сотта мұндай қылмыстар міндетті түрде «Кісі өлтіруге оқталу» бабымен саралануы тиіс деген түсініктеме бар. Соған қарамастан, прокурордың ұстанымын өзгерткені және соттың істі қайта саралауы бізге түсініксіз. Біз мұны жазаны негізсіз жеңілдету деп санаймыз. Әділдікке жеткенше соңына дейін барамыз».
Айта кетейік, бастапқыда тергеу ісі «Адам өлтіруге оқталу» дерегі бойынша жүргізілген. Алайда сот соңғы сәтте бапты өзгертіп, жеңіл жаза тағайындаған.
