Жетісу облысында құқық қорғау органдары жерасты есірткі зертханасын жойды. Арнайы операцияның нәтижесінде синтетикалық есірткі өндірумен айналысқан қылмыстық топтың әрекетіне тосқауыл қойылып, жүздеген адам есірткі зұлымдығының құрбаны болудан аман қалды.
Полиция, прокуратура және Ұлттық қауіпсіздік комитеті департаменттерінің бірлескен жедел іс-қимылы барысында Ескелді ауданының аумағында жасырын әрі кәсіби жабдықталған жерасты зертханасы анықталған. Тергеу кезінде екі шетел азаматы мен Астана қаласының тұрғыны синтетикалық есірткі дайындаумен айналысқаны белгілі болды.
Тінту кезінде тәртіп сақшылары 6,4 келіден астам мефедрон есірткі заты мен өндірістік көлемде есірткі өндіруге арналған құрал-жабдықтарды тәркіледі. Сонымен қатар, прекурсорлардың қалдығы бар 200 литрлік реактор табылды. Барлық айғақ заттар сараптамаға жіберіліп, күдіктілер ұсталып, уақытша ұстау изоляторына қамалды.
Тергеу материалдары сотқа жолданып, Талдықорған қаласындағы Жетісу облысының мамандандырылған сотының үкімімен үш айыпталушы да кінәлі деп танылып, әрқайсысы 16 жылға бас бостандығынан айырылды.
Полиция департаментінің мәліметінше, жүргізілген жедел шаралар нәтижесінде ірі есірткі өндірісіне нүкте қойылып, қоғам үшін аса қауіпті синтетикалық заттың таралуына жол берілмеді. Бұл – өңірде есірткі қылмысына қарсы бағытталған жүйелі күрестің нақты нәтижесі.
Құқық қорғау органдары тұрғындарды қоғамдағы қауіпсіздік мәселелеріне бейжай қарамауға шақырады. Егер есірткіні сақтау, пайдалану немесе тарату деректері туралы ақпарат белгілі болса, азаматтар 102 нөміріне немесе полицияның ресми әлеуметтік желілеріндегі жеке хабарламалар арқылы хабарласа алады. Барлық ақпарат анонимді түрде қабылданады, ал әрбір хабар – бір адам өмірін сақтап қалуға және қоғамды есірткі дертімен күресте алға жылжытуға мүмкіндік береді.
«Жетісу-Ақпарат»
