Жетісу облысында оқиға орнындағы құпиялылықты сақтау үшін арнайы криминалистикалық шатыр қолданысқа енгізілді.
Бұл туралы 7-su.kz ақпарттық порталы облыстық полиция департаментінің баспасөз қызметіне сілтеме жасап хабарлайды.
Жаңа жабдық құқық қорғау қызметкерлерінің жұмыс тиімділігін арттырып, азаматтардың жеке деректерін қорғауға бағытталған. Енді тергеу және өзге де жедел іс-шаралар кезінде полицейлер арнайы жылдам жиналатын шатырды қолданатын болады.
Мамандардың айтуынша, мұндай бастама кәсіби әрі этикалық талаптарға сай жұмыс жүргізуге мүмкіндік береді. Шатыр оқиғаға қатысушылардың және тергеу барысының құпиялылығын қамтамасыз етеді.
Құрылымының ерекшелігіне тоқталсақ, шатырдың еден өлшемі 3,3 х 3,85 метр, биіктігі ортасында 2,25 метр, ал бұрыштарында 1,85 метр. Салмағы небәрі 20 келі. Екі дайындалған қызметкер шатырды 80 секундтың ішінде орнатып, 120 секундта толық құрастыра алады. Бұл — төтенше жағдайларда жылдам әрекет етуге мүмкіндік береді.
Шатырдың әр қабырғасында желдету және шолу терезелері, ал сыртына жауын-шашыннан қорғайтын арнайы жапқыштар орнатылған. Қабырғаларында алыстан көрінетін “POLISIA” жазуы бар жарық шағылыстырғыш шеврондар орналасқан.
Бұған дейін мұндай жағдайларда қарапайым маталар пайдаланылып келген, алайда олар толық құпиялылық пен қорғанысты қамтамасыз ете алмайтын. Ал жаңа шатыр бұл мәселені шешіп, тергеу шараларын жоғары этикалық және кәсіби деңгейде өткізуге жол ашады.
Жетісу облысы полиция департаментінің өкілдері бұл бастама ішкі істер органдарының заманауи стандарттарға көшуіндегі маңызды қадам екенін атап өтті.
«Біз үшін тек тиімділік емес, сонымен қатар азаматтардың жеке өмірі мен қадір-қасиетіне деген құрмет те маңызды», – делінген департамент хабарламасында.
