Жетісу облысында полицейлер мектеп оқушыларымен профилактикалық кездесу өткізді, – деп хабарлайды Polisia.kz.
Талдықорған қаласындағы №10 мектепте Жетісу облысы полиция департаментінің қоғамдық қауіпсіздік басқармасының қызметкерлері оқушылармен кездесу өткізіп, олардың құқықтық санасын арттыруға және жауапкершілік сезімін қалыптастыруға бағытталған профилактикалық іс-шара ұйымдастырды.
Полиция өкілдері профилактиканы ерте жастан бастаудың маңыздылығын атап өтті, себебі дәл осы кезеңде адамгершілік пен азаматтық сана қалыптасады. Кездесу барысында оқушыларға интернет кеңістігіндегі қауіптер туралы, қылмыстық ықпалдың зияны мен шынайы және виртуалды өмірдегі дұрыс пен бұрысты ажыратудың маңыздылығы түсіндірілді. Сонымен қатар әлеуметтік желілердегі мінез-құлық мәселесіне ерекше назар аударылды.
Полицейлер жастарды күмәнді «трендтерге» ермеуге, арандатушылық әрекеттерден сақ болуға және әрбір іс-әрекет үшін жауапкершілік бар екенін ұмытпауға шақырды. Мұндай кездесулер оқушыларға Заң мен тәртіптің жай ғана ереже емес, қоғамның қауіпсіздігі мен үйлесімді дамуының негізі екенін түсінуге мүмкіндік береді. Саналы болашаққа бастайтын жол бүгінгі жауапты қадамнан басталады.
