Қазір өңір аумағында «Мал ұрлығы» республикалық жедел алдын алу іс-шарасы өтіп жатыр. Оның басты мақсаты – мал ұрлығына байланысты қылмыстардың алдын алу, оларды ашу, сондай-ақ ет және ет өнімдерін тасымалдау мен сату кезінде құқық бұзушылықтарды анықтау.
Бар болғаны екі күннің ішінде тәртіп сақшылары мал ұрлығына қатысты екі қылмыстық істі тіркеп, бұған дейін ашылмаған төрт істі әшкереледі. Бұл нәтижелер іс-шараның тиімділігін және полицейлердің ауыл тұрғындары мен шаруа қожалықтарының мәселелеріне жауапкершілікпен қарайтынын көрсетеді.
Профилактикалық іс-шара аясында полицейлер 69 ет сату нысанын және ет тасымалдаған 83 көлікті тексерді. Нәтижесінде құжатсыз өнім тасымалдаудың бес дерегі мен ветеринариялық ережелерді бұзудың 43 жағдайы анықталды. Бұдан бөлек, 138 шаруа қожалығы тексеруден өтті.
Тексеру кезінде Мақаншы–Алматы бағытындағы жолда Абай облысынан келе жатқан жолаушылар автобусы тоқтатылды. Көліктің жүк бөлігінен 100 ұсақ және 2 ірі қара малдың еті табылды. Жүргізуші етті Алматы қаласындағы базарлардың біріне жеткізіп беру үшін алғанын түсіндірген. Аталған дерек бойынша материал ветеринариялық инспекцияға жолданды.
Полиция қызметкерлері «Мал ұрлығы» іс-шарасы аясында кешенді тексерістерді жалғастыруда. Тәртіп сақшылары азаматтарды ет және ет өнімдерін тасымалдау мен сату кезінде заң талаптарын қатаң сақтауға, сондай-ақ мал ұрлығына қатысты күмәнді деректер туралы дереу полицияға хабарлауға шақырады.
«Жетісу-Ақпарат»
