2025 жылы Қазақстанның Қарулы күштерінде ауқымды цифрлық реформалар жүзеге асырылды. Президенттің тапсырмасы бойынша Қорғаныс министрлігі әскерге шақыру жүйесі мен әскери қызметті толықтай заманауи технологияларға көшіруде, – деп хабарлайды 7-su.kz ақпараттық порталы ведомствоның ресми мәліметіне сілтеме жасап.
Биылғы жылдың басты жаңалығы – «e-Медосмотр» ақпараттық жүйесінің енгізілуі. Бұл жүйе медициналық тексеру процесін жеделдетіп, қағазбастылықты жойды. Астана, Шымкент қалаларымен қатар, Жетісу және Батыс Қазақстан облыстарында сәтті іске қосылған жоба Денсаулық сақтау министрлігінің деректер базасымен тікелей байланысқан. Енді дәрігерлер шақырылушының денсаулығы туралы 100-ден астам параметрді нақты уақыт режимінде көре алады, ал қорытындылар ЭЦҚ және QR-код арқылы бекітіледі.
Жасанды интеллект және «Smart» шешімдер
Әскерге шақыру науқанында адам факторын азайту үшін бірнеше жаңа платформа іске қосылды:
-
«Smart военкомат»: Жасанды интеллект көмегімен шақырылушылардың тізімін автоматты түрде түзеді. Жүйе азаматтың білімін, денсаулығын, тіпті жүргізуші куәлігінің бар-жоғын ескеріп, хабарламаларды өзі жібереді.
-
ARMIA.KZ сервисі: Әскери қызметке қатысты сұрақтарға жауап беретін арнайы чат-бот. Оған енгізілген жасанды интеллект пайдаланушыларға кез келген уақытта жедел кеңес береді.
Sarbaz+: Фитнес-браслет таққан сарбаздар
Цифрлық өзгерістер тек әскерге шақырумен шектелмейді. «Sarbaz+» пилоттық жобасы аясында сарбаздардың денсаулығы фитнес-браслеттер арқылы бақылана бастады. Сонымен қатар, мерзімді қызметтегі жастар IT, телекоммуникация және дрондарды басқару сияқты сұранысқа ие мамандықтарды меңгеруге мүмкіндік алды.
Бұл реформалардың басты мақсаты – әскерге шақыруды ашық ету, сыбайлас жемқорлықты жою және әскери қызметтің сапасын халықаралық стандарттарға сай арттыру.
