Текелі қаласының Мәдениет үйінде «Адал азамат» жобасы аясында өткен «Рухтың күші – Әкеде» атты форум мазмұны мен мәні терең тағылымды жиын болды. Бұл басқосу ұлт болашағына бағытталған ойлы үндеу, жауапкершілікке шақырған рухани мінбер іспетті әсер қалдырды.
Форумның басты мақсаты – әке тәрбиесінің қоғамдағы рөлін арттыру, отбасылық құндылықтарды нығайту, ұрпақтар сабақтастығын дәріптеу. Себебі отбасы мемлекеттің іргетасы болса, сол іргетастың берік болуы ең алдымен әкенің парасаты мен жауапкершілігіне байланысты.
Жиынға қала зиялылары, ардагерлер, құқық қорғау органдарының өкілдері, ұстаздар мен ата-аналар, сондай-ақ облыстық Аналар кеңесінің мүшелері қатысты. Әке тақырыбы тек бір отбасының шеңберінде қалмай, тұтас қоғамның ортақ мәселесіне айналғанын аңғартты.
Текелі қаласы бойынша білім бөлімінің басшысы Нұрлан Нүсіпбеков өз сөзінде тәрбие – мектептен бұрын отбасында басталатынын атап өтті. Баланың мінезі мен дүниетанымының қалыптасуында әкенің орны айрықша екенін тілге тиек етіп, білім мен тәрбиенің егіз ұғым екенін жеткізді.
Жетісу облысының және Текелі қаласының Құрметті азаматы, қалалық Ақсақалдар кеңесінің төрағасы Ертай Дүйсебаев ұлттық тәрбие мен дәстүр сабақтастығы жайлы ой қозғап, қазақ қоғамындағы әкенің тарихи рөліне тоқталды. «Әке көрген оқ жонар» деген даналық сөздің астарында тұтас ұлттың тәрбиелік философиясы жатқанын айта келе, бүгінгі әкелерге артылар жауапкершіліктің жүгі ауыр екенін жеткізді.
Форум барысында түрлі номинациялар бойынша өнегелі әкелер марапатталды. Бұл көптің көз алдында әкелік еңбекті мойындау ғана емес, жас буынға үлгі көрсету.
Патриоттық тәрбие, құқықтық сана, отбасы құндылықтары тақырыптарында өрбіген пікір алмасулар форумның мазмұнын байыта түсті. Концерттік бағдарламалар мен спорттық қойылымдар жиынның рухын асқақтатып, әке мен бала арасындағы байланыс тек сөзбен емес, әрекетпен де көрініс табатынын көрсетті.
Бүгінгі қоғамда әке бейнесі жаңа мазмұнмен толығуда. Ол – тек асыраушы ғана емес, тәрбиеші, серіктес, бағыт беруші тұлға. Жаһандану дәуірінде ақпарат ағымының тасқынына қарсы тұратын рухани қалқан да отбасындағы берік байланыс. Ал сол байланыстың өзегінде әкенің мейірімі мен талапшылдығы, әділдігі мен парасаты тұрады.
«Рухтың күші – Әкеде» форумы осы шындықты тағы бір мәрте айқындап берді. Мұндай тағылымды кездесулер қоғамдағы әке мәртебесін көтеріп қана қоймай, жауапты әкелік мәдениетті қалыптастыруға, ұлттық құндылықтарды жаңғыртуға ықпал ететіні сөзсіз.
Медет ЖҰМАБАЙ
