Орталық кітапхана ұжымының бастамасымен ұйымдастырылған тағылымды шараға аймақтағы зиялы қауым өкілдері, ақын-жазушылар, әнуартанушылар, кітапханашылар мен оқырмандар қатысты. Кеш аясында жазушының бай мұрасын насихаттау мақсатында «Ұлтын сүйген Әнуар» атты кітап көрмесі ұйымдастырылды. Осы орайда кітапхана қорындағы қаламгердің том-том еңбектері, мерзімді басылымдарда жарияланған мақалалар мен естеліктер жан-жақты таныстырылды. Олардың арасында автордың ұлы ойшыл Әбу Насыр әл-Фарабидің ғұмырын арқау еткен «Ұстаздың оралуы», «Көгілдір таулар», «Отырардан жеткен сый», «Қарасұңқар көпірі», «Махамбеттің жебесі», «Жаушы», «Адамдар жолы», «Таным» сынды повесть-романдары бар.
Іс-шара барысында Алматы қаласынан арнайы онлайн байланысқа шыққан филология ғылымдарының докторы, прозашы, жазушы, Қазақстан Жазушылар одағының мүшесі, әнуартанушы Кәкен Қамзин қаламгердің ізгі адамгершілігі мен ұлты үшін сіңірген еңбектеріне кеңінен тоқталып, құнды естеліктер және тарихи деректермен бөлісті. Сонымен бірге Түркі тілдес халықтар әдеби қауымдастығының мүшесі, филология ғылымдарының кандидаты, әнуартанушы Ербол Ақшолақов сөз сөйлеп, аядай ауылда туып-өскен қарапайым қазақ баласының ұлы еңбектері әлемдік деңгейде танылып, жоғары бағаланғанын айрықша атап өтті.
Әнуар Әлімжанов 1930 жылдың 12 мамырында бұрынғы Жетісу өңірінің Сарқан ауданына қарасты Қарлығаш ауылында дүниеге келген. Алдымен анасынан, кейін 1941 жылы әкесінен айырылып, жетім қалған ол интернатта, балалар үйінде тәрбиеленіп, білім алған. 1949 жылы Лепсі педагогикалық училищесін, 1954 жылы Қазақ мемлекеттік университетінің журналистика бөлімін бітірген. Жазушылық және журналистік еңбек жолын облыстық «Алма-Атинская правда» газетінде бастаған. Бұдан кейін «Литературная газетаның» Қазақстан бойынша меншікті тілшісі, «Ленинская смена» газеті редакторының орынбасары, Қазақстан және Қырғызстан республикалары бойынша «Правда» газетінің тілшісі, «Қазақфильм» студиясының бас редакторы, «Қазақ әдебиеті» газетінің бас редакторы, Қазақстан Жазушылар одағы басқармасының бірінші хатшысы, республикалық тарихи ескерткіштер мен мәдениетті қорғау жөніндегі Қазақ қоғамы Орталық кеңесі президиумының төрағасы, КСРО Жоғарғы Кеңесі Ұлттар Кеңесінің төрағасы сынды қызметтер атқарған. Сондай-ақ ол Азия және Африка елдері жазушыларымен байланыс жөніндегі комитеттің, Африка халықтарымен достықтың Қазақ ассоциациясы президиумының, Африка халықтарымен достық ассоциациясы басқармасының мүшесі, Қазақ КСР және КСРО Жоғарғы Кеңестерінің депутаты болған. Қазақстан Ленин комсомолы, Қазақ КСР Мемлекеттік және Халықаралық Дж. Неру атындағы сыйлықтардың лауреаты. «Құрмет Белгісі», Халықтар Достығы ордендерінің иегері. Қазақстанның Халық жазушысы. Кеште жеке-жеке сөз алған Халықаралық «Алаш» әдеби сыйлығының иегері Әміре Әрін, Жетісу университетінің доценті Дүйсен Аңсабаев сынды зиялы қауым өкілдері Әнуар Әлімжановтың ұлт руханиятына қосқан сүбелі үлесі мен ұрпаққа қалдырған мол мұрасы туралы әңгімелеп, мұндай тәрбиелік мәні зор тағылымды шараның маңызы зор екенін ерекше атап өтті.
Шара соңында Әлем халықтары жазушылары одағының мүшесі, ақын Роза Жылқайдарова мен аймақтағы «Әнуар оқулары» байқауының жеңімпаздары жүрекжарды арнау жырларын оқыса, Н.Тілендиев атындағы балалар музыка мектебінің оқушылары әсем әндер шырқап, көпшілікке әсерлі рухани көңіл-күй сыйлады.
Айдын КӘЛІМХАН
