Кейбір жандар бір перзентке зар болса, енді бірі баласынан бас тартып жатады. Ата-анасыз қалған жеткіншек үлкендерден жылу іздеп, жақсы отбасына түсуді армандайды. Жанашыр жанды тапқан күннің өзінде әке-шешенің жылуын көрмей өскендiктен баланың басқа ортаға үйренуі, жаңа ата-ананың да баланы бірден қабылдай қоюы қиын іс. Бұл қиындықты жеңе алмаған ерлі-зайыптылардың асырап алған баланы керi қайтарған кездері де бар. Осы түйінді шешу мақсатында «Ана үйi» қоғамдық қорының жанынан бала асырап алушы ата-аналарға арналған мектеп жұмысын бастады. Мұндай орталық жуырда Талдықорған қаласынан да ашылды.
Бала асырап алуға қолдау көрсету орталығы перзентті болғысы келетін отбасына кеңес беріп, көмек көрсету және балалар үйiне жыл сайын келiп түсiп жатқан ата-анасыз қалған жеткіншектердің санын азайту мақсатында жұмыс істейді. Аталмыш орталық ҚР Білім және ғылым министрлігінің, «Ана үйi» қоғамдық қорының және Алматы облыстық жастар саясаты мәселелері басқармасының қолдауымен үш күндік семинар-тренинг ұйымдастырды. Оны Алматы және Орал қаласынан келген тренерлер Шынар Наурызбаева және Айгүл Нұрмұқанова жүргізді.
Жастарға қызмет көрсету орталығында өткен шараға облысымыздағы балалар үйлерінің тәрбиешілері қатысты. Семинарды ұйымдастырудағы мақсат – тәрбиешілердің балаға деген жылы қарым-қатынасы мен жаңаша көзқарасын қалыптастыру. Осыған орай тәрбиешілер өздерін мазалайтын мәселелер, жұмыс барысында кездесетін қиындықтарымен бөлісіп, тренерлердің көмегімен оны шешу жолдарына жіті назар аударды. Сондай-ақ, балалар үйіндегі жеткіншектердің психологиясы, олардың ата-аналарымен жұмыс істеу жайы да жан-жақты сөз болды.
Шараны ұйымдастырушылар отбасы тәрбиесін көріп, кейін балалар үйіне түскен жеткіншектің психологиясындағы өзгерістерді арқау еткен «Джон» атты зерттеу фильмін көрсетіп, тәрбиешілер жұмыс тәжірибесінде жиі ұшырасатын осынау мәселені де талқыға салды.
Бала асырап алғысы келетiн ата-аналармен жеке жұмыс iстеп, оларды жауапты қадамға дайындау, балаларға да психологиялық көмек көрсету де аса маңызды іс. Осы тұрғысында да кеңес алған тәрбиешілер семинар-тренингтен терең ой түйіп қайтты.
