Облыс театрлары арасында Қазақстанның халық әртісі Қанабек Байсейітовтің 120 жылдығына арналған фестиваль-байқауда Ақсу халық театры «Арқалық батыр» тарихи драмасы арқылы Бас жүлдені иеленді.
Бұл туынды — ел тәуелсіздігі мен ұлттық рухты дәріптейтін, ерлік пен бірліктің мәңгілік мәнін ашатын сахналық шығарма.
Авторлық ұжымның айтуынша, пьесадағы басты кейіпкер Арқалық батыр — халқының бостандығы мен жерінің тұтастығы жолында күрескен тарихи тұлға. Шығармада батырдың жеке ерлігімен қатар, елін ұйыстырып, бірлікті насихаттауы, халықты ортақ мақсатқа жұмылдыра білуі ерекше көрініс тапқан.
Драманың оқиғасы дөрбіт (моңғол) шапқыншылығы кезінде өрбиді. Ел шетіне жау тиген қиын шақта Арқалық бастаған ерлер азаттық үшін атқа қонады. Қойылымда тек шайқас емес, ел ішіндегі опасыздық пен татулық мәселелері де терең суреттеледі.
Басты рөлді сомдаған Ілияс Нұрланбеков Арқалықтың өр мінезін, елге деген адалдығы мен рух биіктігін шебер көрсетті. Сондай-ақ Қапар Қали (Майшы би), Жасұлан Китапиянов (Сыдық), Болатбек Ешмұхамбетов (Ажы), Гүлім Кәрім (Мақпал) сынды әртістердің ойыны көрермен көңілінен шықты.
Көпшілік сахналарында мәдениет қызметкерлері қатысып, тарихи атмосфераны, халықтың елдік рухын айқын көрсетті.
Гүлжан ТҰРСЫН
