Талдықорғанда «Атасының баласы» атты көркем фильмнің тұсаукесері өтті. Талантты режиссер Ерлан Ұшақбаевтың бұл туындысы көрермен жүрегіне жол тауып, жұртшылыққа ерекше әсер сыйлады. Жиналған көпшілік экраннан өмірдің өзінен алынған шынайы оқиғаны көріп, көңілі толқыды, көзіне жас үйірді.
Фильм сюжеті алғашқыда қарапайым көрінгенімен, астары терең әлеуметтік мәселелерді қозғайды. Қарттар үйінде тұратын зейнеткерлер балалар үйіне концерттік бағдарлама көруге барады. Алайда күтпеген жерден коронавирус індеті тарап, кейіпкерлер балалар үйінде карантинге жабылып қалады. Осылайша екі түрлі әлем – қарттар мен балалар тағдыры бір кеңістікте тоғысады.
Бастапқыда бір-біріне жат көрінген «ата мен бала» ұғымындағы бұл екі буын ортақ тіл таба алмай, араларында түсініспеушілік орын алады. Бірақ уақыт өте келе, мәжбүрлі оқшаулану олардың арасындағы алшақтықты жойып, рухани жақындасуға жол ашады. Кинодағы түрлі оқиға арқылы кейіпкерлер бір-бірінен жан жылуын тауып, тағдырлас жандарға айналады.
Фильмде басты рөлдердің бірін сомдаған актер Кендебай Темірбайұлы бұл туындының қоғам үшін маңызы зор екенін атап өтті. Оның айтуынша, мұндай фильмдер жетімдік ұғымының жойылуына, адамдардың жүрегінде мейірім мен жауапкершілік сезімінің оянуына ықпал етуі тиіс. Ол жаңа шығарманың еліміздің барлық өңірінде көрсетіліп, әсіресе балалар мен қарттар үйлерінде кеңінен насихатталғанын қалайтынын жеткізді.
– Осы фильмнен ой түйген жан болса біз бақыттымыз. Театр мен кино саласы негізінде ұжымдық еңбек қой. Бұл ұлық дүниені туындының басында тұрған, идея авторы Гүлмира Зербай қарындасымыз Жетісу жерінде дүниеге әкелді. Осы киноның көрсетілімі тек Талдықорғанда шектеліп қалмаса екен деймін. Бұл фильмді республикаға көрсетуге болады. Жақсы шығарманың дүниеге келгеніне өз басым ризамын. Игілікті істің басында болған әрбір жанға қалай алғыс айтсақ та жарасады, – дейді актер Кендебай Темірбайұлы.
Туындының басты ерекшелігі – оның өмір шындығын айна-қатесіз бейнелеуінде. Фильм қазіргі қоғамдағы өзекті әрі ащы мәселелерді бүкпесіз көрсетеді. Кейбір балалар ата-ананың мейірімінен шет қалып жатса, енді бір қарттар өз перзентіне артық жүк секілді көріне бастайды. Осындай күрделі әлеуметтік тақырыптарды арқау еткен картина көрермен жүрегіне жол тауып, ешкімді бейжай қалдырмайды.
– Біз бұл киноны көріп қана қоймадық. Мұндағы балалармен бірге сол тағдырды кештік. Еш уақытта аналары балаларынан айырылмасын. Бала да, ана да, ата да бақытты өмір сүрсін. Өкінішке қарай өмір болғаннан кейін кинодағы жағдайлар қоғамда бар. Елімізде қарттар үйі, жетімдер үйі болмасын. Өмірдің қасіретін көрсетіп, соны осы жұрт түсінсін деп еңбек еткен ұжымға үлкен алғысымды айтамын, – дейді облыстық Аналар кеңесінің төрайымы Жамал Баймадиева.
«Жетісу» телеарнасының директоры Думан Алтынбекұлы:
– Наурыз мерекесі қарсаңында көрерменге жол тартқан төл туындымыздың тұсаукесері құтты болсын! Киноны қайталап көрсек те көмейімізге өксік тығылып, көз жасымызды бір сығып алдық. Ең бастысы кинодан көп ой түйдік, әсер алдық. Осы туындыға атсалысқан барлық азаматқа, әсіресе театр ұжымына, серіктесіміз болып кеткен «Айналайын» балаларды қолдау орталығына көп-көп рахмет. Аз ғана қаржымен осындай үлкен туындыны жасап шыққан Ерлан Ұшақбаев бастаған түсірілім тобына мың алғыс. Осыдан 10 жыл бұрын Бейсен Құранбектің идеясымен «Ләйлә» киносымен басталса, сол дәстүр жалғасып, былтырдан бері 2 жылдың ішінде үшінші кинотуындының тұсауын кесіп жатырмыз. Ол да болса біздің еңбегіміздің, үмітіміздің ақталғаны. Алла бұйыртса, түсірілім тобы биыл да бірнеше туынды түсіруді жоспарлап отыр, – дейді ол.
Аталған шығарма отбасы деген ұғымның тек қандық байланыспен шектелмейтінін, ең алдымен, жауапкершілік, қамқорлық пен махаббатқа негізделетінін еске салады. Фильм көрерменді бір сәтке тоқтап, өмірдің қарбаласында назардан тыс қалып жатқан ең қымбат жандарды – ата-ананы, баланы, қарттарды ойлауға шақырады.
Бұл туындыны ұрпақтар сабақтастығы мен адамгершілік құндылықтардың мәңгілік екенін тағы бір мәрте дәлелдеген әсерлі шығарма десек қателеспейміз.
Медет ЖҰМАБАЙ
