Алматыда Бикен Римова атындағы Талдықорған драма театрының гастрольдік сапары аясында көрермендерге бірқатар спектакль ұсынылуда. Мәдени шара 21-23 сәуір күндері аралығында өтуде.
Театр репертуарындағы ерекше туындылардың бірі – Қанат Тілеуханның «Медаль» атты саундрамасы. Қойылымда марапат пен еңбек, атақ пен абыройдың шынайы мәні терең философиялық тұрғыда суреттеледі. Бұл туындыны режиссер Фархат Молдағали сахналаған. Автор мен режиссер арасындағы шығармашылық үндестік спектакльдің эмоционалды әсерін күшейтіп, көрерменді терең ойға жетелейді.
«Қоғамда атақтың тым көп берілуі – алаңдатарлық жайт. Оның шығармашылыққа, адамның ішкі әлеміне қалай әсер ететінін көрсетуге тырыстым. Атақтың да қадірі болуы керек», — дейді қойылым авторы Қанат Тілеухан.
Ал режиссер Фархат Молдағали болса:
«Бүгінгі қоғамда марапат мәселесі өте өзекті. Осыны сахна тілімен жеткізгім келді. Театр маған спектакль қажет екенін айтқанда, бірден «Медаль» саундрамасын ұсындым, — деп пікір білдірді.
Гастрольдік сапар аясында театр ұжымы тағы бірнеше қойылымды ел назарына ұсынбақ. Бұл шара – өңірлік мәдениеттің дамуына серпін беріп, театр өнерінің ел ішіндегі маңызын арттыра түсуде.
«Жетісу-Ақпарат»
Фото: Видеодан алынған кадр
