Жыл өткен сайын жетісулық шаруалар ауылшаруашылық техникасын жаңалап, жұмыс қарқынын арттырып келеді. Облыс әкімінің қолдауымен кейінгі төрт жылда ауылшаруашылық техникасын сатып алуға 6 млрд. теңге жұмсалып, заманауи техника еңбек етем деген егіншінің жұмысына серпін берді. Сондай мүмкіндікке ие болғандардың бірі Ескелді ауданындағы «Нам Г. Н.» шаруа қожалығы.
Аталған шаруашылық биыл да көктемгі егіс жұмысына ерте кірісті. Өйткені олар тағы да Германияда өндірілген жер жырту, тұқым себу, арамшөптерді отау, егінді жинау сияқты сан салалы жұмысты бір ғана өзі атқаратын қуатты техниканы сатып алды. Тракторының өзі 60 млн. теңге, агригателі 20 млн. теңге тұратын техниканы «Жетісу» ӘКК» ҰК» АҚ арқылы лизингке алып отыр. Осындай мүмкіндікке қол жеткізген шаруа- шылық иесі Герман Намның құлшынысы басым.
– Шаруашылықта жаңа техникалардың қатарын көбейтуді қолға алдық. Соның арқасында жұмыс күші азайып, шығын тежелді. Есесіне, жұмыс өнімділігі жоғарылап, болашаққа деген сенім артып келеді, – дейді ол.
Шаруашылық жұмысын көруге келген облыс әкімінің орынбасары Серікжан Бескемпіров биыл аймақтағы егістік көлемінің едәуір артқанын тілге тиек етті. Оған жаңа техниканың көбеюі мен суландыру жүйесін қалпына келтіруге көрсетілген көмектің көп ықпал еткенін жеткізді.
– Қазіргі таңда облыста көктемгі егіс жұмысы қызу жүріп жатыр. Осы мақсатта 21 мың тонна сұйық отын бөлінген. Бүгінде наурыз айына тиесілі 6 мың тонна сұйық отын шаруа- ларға үлестірілді. Аймақтағы 6 нефтебазада жанар-жағармай қоры толық. Әр аудан өзіне белгіленген базадан керекті сұйық отынды кез келген уақытта алуға мүмкіндігі бар. Тұқым да жеткілікті, техника да сақадай сай, – дейді ол.
Аталған шаруа- шылықтың жаңа техникасы бізді де қызықтырды. Бір ретте төрт трактордың істейтін жұмысын бір өзі ғана атқарады. Сонымен қатар, жаңа техника компьютермен басқарылатындықтан барлық жұмыс ритмі сол арқылы бақыланып, реттеліп отырады. Бір қуанарлығы, сатып алынған заманауи техниканың 25 пайызын инвесторлық демеуқаржы арқылы Үкімет шаруашылыққа қайтарып береді. Қалған соманы 7 жылға бөліп төлейтіндіктен шаруа- ның қалтасына ауыр салмақ түспейді.
Кейінгі жылдары Ислам даму банкінің есебімен өңірлердегі суландыру жүйелерін қайта қалпына келтіру жұмысы қолға алынды. Осы мақсатта 126 мың гектар жерді суландыру жұмысы жоспарға алынған. Бұл жоба өткен жылы Ескелді ауданында басталды.
– Көктемгі егіс жұмысы бойынша биыл өңірдегі 26 мың гектар жер жыртылуы керек. Қазір оның 25 пайызы орындалды. Мұның 2900 гектарға қант қызылшасы тиесілі. Өткен жылы басталған аудандағы егіс алқаптарын суландыру жүйесін қалпына келтіру жұмысы биыл аяқталады деп күтілуде. Соның есебімен 4260 гектар жерді суландыру жүйесі жақсарады, – дейді Ескелді ауданы әкімінің орынбасары Ермек Апеков.
Жоспар бойынша суландыру жүйелерді қайта қалпына келтіру жұмысы алдағы уақытта Көксу, Ақсу, Алакөл аудандарында да басталады. Осындай игілікті істер Герман Нам сияқты көптеген шаруаның сенімін ұштайтыны анық.
Қажет АНДАС
Ескелді ауданы
