Ұзынағаш кәсіптік колледжі мұражайына жыр алыбы Жамбылдың мүсіні қойылды.
Ауылшаруашылығына қажетті арнаулы мамандардың бірнеше буынын дайындаған, 85 жылдық тарихы бар колледжде оқу орнының мұражайы ашылып, ақын бейнесі мұражай төрінен орын алды. Мұнда кəсіптік білім беру саласына еңбегі сіңген колледж ұстаздары мен іргелі білім ордасын əр жылдары басқарған азаматтардың және колледжден шыққан еңбек озаттарының құрметіне арналған жәдігерлер топтастырылған. Колледж бұған дейін ұзақ жылдар бойы «Жамбыл атындағы кәсіптік-техникалық училище» деген атаумен жұмыс істеген болатын. Кейінгі жылдары колледж қызметі заман талабына орай жанданып, оқу ғимараттары мен жатақханасының сыртқы келбеті айшықтала түсті. Мұнда берілетін кәсіптік білімнің бірнеше түріне негізінен алыс ауылдардың балалары оқытылады. Олардың арнаулы білім алуымен қатар өткеннен хабардар болып, ел-мен жерді танып, жақсы тәрбие алып шығуына баса мән берілгенін мұражай жәдігерлерінен де байқауға болатындай.
Бірегей білім ордасының тарихынан сыр шертетін мұражайдың алғашқы қонағы аудан әкімі Бағдат Әлиев пен Ұзын- ағаш ауылдық округінің әкімі Ескелді Қасымов болды. Бағдат Байшал-ұлы мұражайдың ашылу лентасын қиып, ақынның 175 жылдығына орай орнатылған Жамбыл бюстінің шымылдығын түсіріп, колледж ұжымын құттықтады. Оларға колледждің тыныс-тіршілігін осы мекемеде басшылық етіп отырған Болат Бекбосынұлы баяндады. Аудан мен ауыл әкімдері пән кабинеттері мен өндірістік шеберханаларды аралап көріп, жаңа технологияларды меңгеруге талпынған білімгерлердің көрмеге қойылған жұмыстарымен танысты.
Серік САТЫБАЛДИЕВ
Жамбыл ауданы
