Талдықорған қаласындағы № 3 Д. Рақышев атындағы қазақ мектеп-интернатының 7-сыныбында «Рухани тұлға» атты тақырыпта қалалық ардагерлер ұйымының кеңес мүшесі, Қазақстан Журналистер одағының мүшесі, танымал ақын Кенжехан Рақышпен кездесу кеші өткізілді.
Сынып оқушылары Кенжехан ағаны мектеп-интернатының ауласынан қарсы алып, іс-шара өтетін сыныпқа қуанышпен алып келді. Кездесу кешінде оқушылар Кенжехан ағаның өмірбаянына шолу жасап, «Ақын өлең жазады», «Көңіл», «Дәуір тынысы», «Еркіндік», «Амандық», тағы басқа да өлең жолдарын мәнерлеп оқып, өздерін толғандырған сұрақтарын қойды. Әсіресе, «Барлау», «Байыптау», «Бағдарлау» атты кітаптарының тақырыптары неліктен бір-біріне ұқсас екендігіне қызығушылық танытты. Оған Кенжехан Мұстағалиұлының берген жауабын ықылас-ынталарымен тыңдады. Кеш соңында Кенжехан аға оқушыларға аталық ақ батасын берді.
Маржан ХАЛЫҚОВА,
Д. Рақышев атындағы мектеп-интернаттың ұстаз-тәрбиешісі.
Талдықорған қаласы.
