Талдықорған қаласындағы «Жастар» саябағында өткен рухани шарада Жетісу облыстық Д.Рақышев атындағы филармония мен «Талдықорған әуендері» ансамблінің әртістері өнер көрсетті. Осы орайда өңір өнерпаздары Елордасының құрметіне арнап әсем сазды әндер шырқап, күбірлі күй, мың бұралған билер орындап аймақ тұрғындары мен қонақтарының ыстық ықыласына бөленді. Сонымен бірге мерекелік думанда Ұлттық домбыра күніне арналған кітап және домбыра көрмесі ұйымдастырылып, шебер қолдан шыққан ұлт аспаптары қалың көрермен қауымының көзәйіміне айналды.
– Бүгінде еліміздің бас қаласы Астана көз сүріндірер көркемдігімен көпке мәлім. Арқа төсінен бой көтерген әсем шаһар жыл санап жасарып-жайнап, өсіп-өркендеп әлем халықтарын да таңдандырып келеді. Қазір елордасына қарап бой түзеген Талдықорған қаласының дамуы да көңіл қуантарлық. Оған дәлел кешегі тоқырау жылдары жарықсыз, сусыз, жылусыз қалған ескі шаһарға облыс орталығы мәртебесі берілгеннен бері тез арада гүлденіп, көркейді. Жолдар салынды. Халықтың өзекті мәселелерге қатысты таллап тілектері орындалды. Қала небір небір тұрғын үй ғимарттары және әлеуметтік нысандармен толықты. Осының барлығы ғарыштап дамудың айқын айғағы. Бастысы еліміз аман, жеріміз тыныш болып, Алла келер жылы да Астана күнін дәл осындай дүркіретіп тойлауға жазсын!, – дейді қала тұрғыны Қалимаш Бекболатова.
Еске сала кетсек, осыдан бірнеше күн бұрынғы Ұлттық домбыра күнін Жетісу жұрты ерекше қарсы алып Талдықорған қаласында бір мезетте 5 мың адам Әбдімомын Желдібайдың «Ерке сылқым» күйін орындап, Қазақстан рекордтар кітабына енген болатын.
Айдын КӘЛІМХАН
