Қазақ әдебиетінің көрнекті өкілі, жазушы, драматург, киносценарист, Қазақстанның Еңбек Ері Әкім Тарази 91 жасында өмірден озды. Қаралы хабарды Қазақстан Жазушылар одағының баспасөз қызметі растады.
“Қадірлі ақсақалымыз Әкім Тарази өмірден озды. Қонақасы мен жерлеу рәсіміне қатысты толық ақпарат кейінірек хабарланады,” – делінген ресми мәлімдемеде.
Әкім Тарази (толық есімі – Әкім Уртайұлы Әшімов) 1933 жылы 9 қыркүйекте Алматы қаласында дүниеге келген. Ол – қазақ әдебиеті мен драматургиясына сүбелі үлес қосқан кеңестік және тәуелсіз Қазақстан дәуіріндегі көрнекті қаламгер.
Өмір жолы мен еңбектері
1950 жылы Жамбыл облысы, Луговой ауданы, Жаңа Тұрмыс ауылында орта мектепті тәмамдаған. 1957 жылы Абай атындағы Қазақ ұлттық педагогикалық университетін бітірген. Алғашқы еңбек жолын мұғалімдіктен бастаған Әкім Тарази кейіннен «Ара» журналы мен «Қазақстан пионері» газетінде қызмет атқарған.
Ол көптеген жылдар бойы «Қазақфильм» киностудиясында, Қазақстан Кинематографистер одағында, Жазушылар одағында басшылық қызметтер атқарып, мәдениет саласында жемісті еңбек етті. Сонымен қатар, ҚР Мәдениет министрлігінде кеңесші, «Қаржы-қаражат» журналының бас редакторы, өнер академияларында оқытушы және профессор болды.
Марапаттары мен атақтары
-
Қазақстанның Еңбек Ері (2021)
-
Қазақстан Республикасының еңбек сіңірген қайраткері (1999)
-
ҚР Мемлекеттік сыйлығының лауреаты (әдебиет және өнер саласы)
Әкім Таразидың қаламынан ондаған роман, пьеса, киносценарий туған. Оның шығармалары қазақ руханияты мен мәдениетінің айнасы іспетті.
Әдебиет пен өнер саласына өлшеусіз еңбек сіңірген қаламгердің жарқын бейнесі ұрпақ жадында мәңгі сақталады.
«Жетісу-Ақпарат»
