Қырғыз әдебиетінің көрнекті өкілі, лирикалық поэзияның дара дарындарының бірі Тұрар Қожомбердиевтің туғанына 85 жыл толуына арналған халықаралық поэзия фестивалі Қырғыз Республикасында ұйымдастырылды. Түркі дүниесінің рухани кеңістігін тоғыстырған тағылымды басқосуға Қазақстан, Өзбекстан және Түркия елдерінен келген ақындар, жазушылар, әдебиеттанушы ғалымдар мен қаламгердің туған-туыстары қатысты.
Ауқымды мәдени жобаны Қырғыз Республикасының Мәдениет, ақпарат және жастар саясаты министрлігі, ТҮРКСОЙ халықаралық ұйымы және Қырғыз Республикасының Ұлттық жазушылар одағы бірлесіп өткізді.
Қазақстан делегациясының құрамында Қазақстан Жазушылар одағы Жетісу облыстық филиалының төрағасы Жангелді Немеребай, Қазақстан Жазушылар одағының мүшесі, ақын Мұратқан Шоқан, Вячеслав Вавилин, және жас қаламгер Еркежан Қайратқызы қатысып, қазақ әдебиетінің ізгі лебізін жеткізді.
Фестивальдің салтанатты ашылуы Алықұл Осмонов атындағы Ұлттық кітапхана ғимаратының Абай залында өтті. Жиынды кітапхана директоры Элдар Ертабылдыұлы жүргізіп, Тұрар Қожомбердиев мұрасының қырғыз әдебиетіндегі орны мен оның түркі халықтарының рухани байланысын нығайтудағы маңызына тоқталды.
Мәдени шара барысында ұйымдастырушылар атынан ТҮРКСОЙ ұйымының Қырғызстандағы өкілі Марат Тағаев, Қырғыз Республикасының Мәдениет, ақпарат және жастар саясаты министрлігі өнер бөлімінің басшысы Ақжол Доранбекұлы және Қырғыз Республикасы Жазушылар одағының төрағасы Қаныбек Иманәлиев сөз сөйлеп, ақын шығармашылығының уақыт өткен сайын құнын арттыра түсетін рухани қазына екенін атап өтті.
Мерейтой аясында ғылыми-тәжірибелік конференциялар, әдеби сұхбаттар, шығармашылық кездесулер мен поэзия кештері ұйымдастырылды. Басқосудың маңызды оқиғаларының бірі – Тұрар Қожомбердиевтің түрік тілінде жарық көрген «Күн. Ғалам. Жүрек» атты жыр жинағының таныстырылымы болды. Бұл еңбекті ақын әрі аудармашы Мұхиддин Гүмүш тәржімалап, түркиялық оқырманға ұсынды.
Халықаралық поэзия фестивалі түркі жұртына ортақ әдеби мұраны дәріптеуге, бауырлас халықтардың мәдени байланысын бекемдеуге және Тұрар Қожомбердиевтің шығармашылық әлемін жаңа қырынан танытуға мүмкіндік берді. Руханият мерекесіне айналған тағылымды шара сөз өнерінің ұлт пен ұлтты жақындастыратын құдіретті күш екенін тағы бір мәрте айқын көрсетті.
Фестиваль қорытындысында қатысушыларға құрмет көрсетіліп, түркі халықтарының әдеби байланысын дамытуға қосқан үлесі үшін арнайы марапаттар табысталды. Халықаралық жыр мерекесіне келген ақын-жазушылар мен қаламгерлер Халықаралық Түрксой ұйымының төрағасы Сұлтан Раев пен Қырғыз Республикасы Жазушылар одағының төрағасы Қаныбек Иманалиевтің дипломымен марапатталды.
Санжар СҰЛТАНҒАЗЫ
