Қырғызстанның Чолпон-Ата қаласындағы классик жазушы Мұхтар Әуезовтің музей-үйі аумағында көрнекті мәдениеттанушы, қоғам қайраткері Мұрат Әуезовтің бюсті салтанатты түрде ашылды. Бұл туралы әдебиеттанушы ғалым Бауыржан Омарұлы өзінің Facebook парақшасында жазды, – деп хабарлайды 7-su.kz ақпараттық порталы.
Бюстің ашылу рәсімі Ыстықкөл халықаралық форумы аясында өтті. Шараға Қазақстан мен Қырғызстанның мемлекет және қоғам қайраткерлері, зиялы қауым өкілдері, ғалымдар мен жазушылар қатысты.
Бауыржан Омарұлының айтуынша, Чолпон-Атадағы Мұхтар Әуезовтің музей-үйі – әлемге танымал қаламгердің қасиетті құтханасы ғана емес, қазақ пен қырғыз халықтарының достығы мен рухани байланысының символына айналған тарихи орын. Сондай-ақ бұл мекенде түркі дүниесінің көрнекті тұлғалары талай рет бас қосып, маңызды мәселелерді талқылаған.
Мұрат Әуезовтің бюстінің авторы – қырғызстандық белгілі мүсінші Тамила Маматова. Ол бұған дейін музей ауласына қойылған заңғар жазушы Мұхтар Әуезовтің бюстін де жасаған болатын.
Салтанатты жиынды ТҮРКСОЙ халықаралық ұйымының бас директоры Сұлтан Раев жүргізді. Іс-шарада Қырғыз Республикасының Мемлекеттік хатшысы Арслан Койчиев, Қазақстан Республикасы Парламенті Сенатының депутаты, академик Дархан Қыдырәлі, шығыстанушы ғалым, Мұрат Әуезовтің қызы Зифа-Алуа Әуезова, Қазақстан Жазушылар одағы басқармасының төрағасы Мереке Құлкенов, Татарстан Жазушылар одағы басқармасының төрағасы Ркаил Зайдуллин және басқа да қоғам қайраткерлері сөз сөйледі.
Қатысушылар Мұрат Әуезовтің түркі халықтарының мәдени байланысын нығайтуға қосқан үлесін атап өтіп, оның ғылыми және қоғамдық қызметіне жоғары баға берді.
Бауыржан Омарұлы өз жазбасында қазақ пен қырғыз халықтарының тарихи бауырластығына тоқталып, Мағжан Жұмабаевтың «Қырғыз – таудың тарпаңы, қазақ – қырдың құланы» деген қанатты сөзін еске алды. Ол қос халықтың достығы мен рухани ынтымақтастығы одан әрі нығая беруіне тілектестік білдірді.
Мұрат Әуезовтің бюстінің ашылуы екі ел арасындағы мәдени-гуманитарлық байланыстың тереңдігін көрсететін маңызды оқиға ретінде бағалануда.
