Алматыда көрнекті ақын, қоғам қайраткері, Қазақстанның халық жазушысы Олжас Сүлейменовтің 90 жылдық мерейтойы аталып өтті, – деп хабарлайды 7-su.kz ақпараттық порталы.
Осыған орай Алматы әкімі Дархан Сатыбалды Мемлекет басшысы Қасым-Жомарт Тоқаевтың атынан мерейтой иесін арнайы құттықтады. Қала әкімі Олжас Сүлейменовтің шаңырағына барып, Президенттің құттықтау хатын табыстады.
Құттықтау хатта Мемлекет басшысы Олжас Сүлейменовтің қазақ әдебиеті мен руханиятына, қоғамдық өмірге сіңірген еңбегін жоғары бағалап, оның шығармашылығы бірнеше буын оқырманға рухани азық болғанын атап өтті. Сондай-ақ ақынның ел мәдениеті мен халықаралық деңгейдегі беделін арттыру жолындағы қызметіне тоқталды.
– Сіз Қазақстанда ғана емес, халықаралық деңгейде де көрнекті ақын, терең ойлы қаламгер әрі беделді қоғам қайраткері ретінде сый-құрметке ие болдыңыз. Сіздің гуманистік идеяларыңыз ұлттық мәдениет пен қоғамдық-саяси ойдың асыл мұрасына айналып, әлемге кеңінен танылды. Бірегей шығармашылығыңыз арқылы қазақ халқының тарихи санасының жаңғыруына өлшеусіз үлес қостыңыз, – делінген Мемлекет басшысының құттықтауында.
Олжас Сүлейменов – қазақ әдебиетінің көрнекті өкілдерінің бірі. Ол поэзия, публицистика және қоғамдық қызмет саласында ұзақ жылдар бойы еңбек етіп келеді. Қаламгердің шығармалары әлемнің көптеген тіліне аударылған.
Мерейтой аясында Алматыда бірқатар мәдени іс-шаралар ұйымдастырылып, зиялы қауым өкілдері мен әдебиет жанашырлары ақынның шығармашылық мұрасы туралы пікір алмасты.
