Облыстық «Тіл» оқу-әдістемелік орталығы Алакөл аудандық филиалында 1 мамыр – Қазақстан халқының бірлігі күні мерекесі қарсаңында «Мемлекеттік тіл: құрмет, қажеттілік, табыс» атты семинар өтті. Қазақстан халқының бірлігі күні қарсаңында ұйымдастырылған семинар мемлекеттік тілге деген құрметті арттырып қана қоймай, оны күнделікті өмірде, еңбек ортасында, қызмет көрсету саласында кеңінен қолданудың қажеттілігін айқындады.
Аудандық ішкі саясат, мәдениет, тілдерді дамыту және спорт бөлімінің басшысы Бейбіт Айтахметов жүргізді. Ол жиынның мән-маңызына тоқталып, мемлекеттік тілдің қоғамдық қатынастардағы рөлін күшейту бағытындағы жұмыстардың аудан көлемінде жүйелі түрде жалғасып келе жатқанын атап өтті.
Одан кейін сөз алған облыстық «Тіл» оқу-әдістемелік орталығының басшысы Жеңіс Жолдыбаев мемлекеттік тілдің ел дамуы мен қоғам тұтастығындағы орнына кеңінен тоқталып, тіл үйрену бүгінгі күннің басты талабы екенін жеткізді. Сондай-ақ, мемлекеттік тілді меңгеру әр азаматтың қоғамдық ортада еркін қарым-қатынас жасауына, кәсіби мүмкіндігін кеңейтуіне, ел өміріне белсенді араласуына жол ашатынын атап өтті.
Семинар барысында «Бұлақты орта мектебі, мектеп жасына дейінгі шағын орталығының» қазақ тілі мен әдебиеті пәнінің мұғалімі, зерттеуші Жанат Аянбаева және облыстық «Тіл» оқу-әдістемелік орталығы Алакөл аудандық филиалының бөлім меңгерушісі Райхан Сейтханова баяндама жасады.
Баяндамашылар мемлекеттік тілдің мәдениетпен, ұлттық болмыспен, рухани құндылықтармен тығыз байланысын жан-жақты түсіндірді. Жиын барысында қатысушылар белсенділік танытып, ой-пікірлерімен бөлісті.
Рысалды Шарапиева
Алакөл ауданы әкімінің баспасөз хатшысы
