Жетісу өңірінде жас оқырмандардың әдебиетке деген құштарлығын арттыруды мақсат еткен «Мизам» жылжымалы әдебиет мектебі қайта жолға шығады. Биылғы дәрістер қазақтың бас ақынына арналмақ. Абай Құнанбаевтың 180 жылдығына орай мектеп «Абай Құнанбаев кім?» тақырыбында арнайы сабақтар өткізеді.
Жоба аясында бұған дейін 8 аудан мен 2 қалада 200-ден астам оқушы қамтылып, олар өлең мен эссе жазудың қыр-сырын үйреніп, тұлғатану бағытында білім алды. Қатысушылар үшін арнайы WhatsApp топтары құрылып, үздіксіз оқуға ынталандыру жұмыстары жүргізілді. Қазірдің өзінде 100-ге жуық жас оқырман тұрақты түрде кітап оқып, рухани білімін жетілдіріп отыр.
Сонымен қатар үш ай демалыста «Үш айда үш кітап» байқауы ұйымдастырылып, оған 100-ге жуық бала қатысты. Оның 35-і жүлделі орынға ие болды.
Жобаға тек жергілікті ғана емес, өзге өңірлерден де қызығушылық артып отыр. Атырау, Орал, Тараз қаласының білім басқармасы мамандары да «Мизамның» тәжірибесін көруге ниет білдірген.
Алдағы жоспарға сәйкес мектеп апталық дәрістерден бөлек оқушылармен подкаст жазуды, Ютуб пен TikTok-та рухани контент ұсынуды және әлеуметтік желідегі оқырман санын арттыруды көздеп отыр. Сондай-ақ, үздік оқушылар арасында пікірталас алаңы ұйымдастырылмақ.
Ата-аналар мен ұстаздар тарапынан жобаны жылына екі рет өткізу жөнінде ұсыныстар түсіп, әр ауданнан 30-40 оқушыны қамту қажеттілігі айтылды.
«Мизам» жылжымалы әдебиет мектебі – жас буынды кітап оқуға баулып қана қоймай, олардың ой-өрісін кеңейтіп, болашаққа деген көзқарасын қалыптастыруға бағытталған маңызды бастама болып отыр.
«Жетісу-Ақпарат»
