Биыл қазақ поэзиясының мұзбалақ ақыны, лирикалық жырдың хас шебері Мұқағали Мақатаевтың туғанына 95 жыл толып отыр. Ақын мұрасы – ұлт руханиятының асыл қазынасы уақыт өткен сайын қадірі артып, оқырманымен қайта қауышып жатқан мәңгілік поэзия.
Осы орайда, Жетісу облысының Мұхамеджан Тынышбайұлы атындағы тарихи-өлкетану музейінде «Мұқағали – мәңгілік ғұмыр» тақырыбында әдеби кеш өткізілді. Шараның басты мақсаты – ақын шығармашылығын насихаттау, жастардың поэзияға деген сүйіспеншілігін арттыру және ұлттық әдеби мұраға құрмет сезімін қалыптастыру.
Әдеби кеш барысында жазушы, аудармашы, облыстық «Жетісу» газеті бас редакторының орынбасары Мәди Алжанбаев ақынның өмір жолы мен шығармашылығы жайлы мазмұнды естеліктермен бөлісті, ақынның сыршыл өлеңдері оқылды. Әдеби кештің көркін енгізіп, мағынасын байытқан М.Мақатаевтың «Алтай-Атырау» поэмасының желісі бойынша өнер көрсеткен Қазақстанның Еңбек сіңірген қайраткері Кендебай Темірбайұлының шәкірттері, «Жас актер» театрының жеткіншектері қойған қойылым.
Оқушылардың жүректен шыққан өлең шумақтары көрермен қауымның да жүрегіне жетіп, көңілін тебірентті. Сонымен қатар, қатысушылар ақын жырларынан үзінділер оқып, өздерінің арнау өлеңдерімен бөлісті. М.Мақатаевтың сөзіне жазылған әндер шырқалып, көрерменге ерекше әсер сыйлады.
Шараға қатысушылар Мұқағали поэзиясының өміршеңдігі мен рухани құндылығы жайлы ой бөлісіп, оның шығармалары бүгінгі ұрпақ тәрбиесінде маңызды орын алатынын атап өтті. Ақын жырлары адам жанын тазартатын, рухын көтеретін, ұлттық болмысты айқындайтын асыл мұра екені тағы бір мәрте айқындалды.
Қазақ әдебиетінде өшпес із қалдырған Мұқағали Мақатаевтың шығармалары – халқымыздың рухани қазынасы. Осындай берері мол шаралар арқылы ақын мұрасын жас ұрпақ санасына сіңіру, оны кеңінен насихаттау – баршамыздың ортақ парызымыз. Мұқағали жырлары мәңгі жасап, ұлт руханиятының темірқазығы болып қала беретіні сөзсіз.
Айгерім Бекенқызы
Жетісу облысының Мұхамеджан Тынышбайұлы
атындағы тарихи-өлкетану музейінің бөлім меңгерушісі
