Кітапхана – адамзат өркениетінің ең маңызды мәдени ошақтарының бірі. Ол тек кітап сақтайтын орын ғана емес, білім мен руханияттың, мәдениет пен тарихтың қазынасы саналады. Қоғамның дамуы мен адамдардың интеллектуалдық өсуінде кітапхананың рөлі ерекше. Сонымен қатар кітапхана – мәдениетті насихаттайтын орын. Кітапханаларда әдеби кештер, кітап көрмелері, кездесулер мен түрлі мәдени іс-шаралар ұйымдастырылады.
Биыл Алакөл аудандық орталық кітапханасы «Мобильді кітапхана» бұрышын ұйымдастырып, қазақ және шетел жазушыларының шығармаларын оқырмандарға QR код арқылы оқуға насихаттауда.
«Кітап оқитын ел зиялы ұлтқа айналады. Біз жас ұрпақтың кітапқа құштарлығын оятуымыз керек», – деп атап өткен мемлекет басшысы Қасым-Жомарт Тоқаев кітап оқу мәдениетін қалыптастыру – ұлттың зияткерлік әлеуетін арттыратын маңызды бағыттардың бірі екенін жеткізді. Осыған орай Алакөл аудандық кітапханасы өңірдегі 9 мекеме арасында өзара ынтымақтастық жөнінде меморандум жасап, жыл бойы бірлескен мәдени-ағартушылық, рухани-танымдық және кітап оқу мәдениетін насихаттауға бағытталған жүйелі жұмыстар жүргізуге кірісті.
Биыл «Бір ел – бір кітап» республикалық акциясы аясында тарихтың қатпар-қатпар шындығын көркем сөзбен қайта тірілткен қаламгер Қабдеш Жұмаділовтің «Тағдыр» романы қалың оқырманға ұсынылып отыр. Бұл шығарма – қазақ халқының күрделі тарихи кезеңдердегі тағдырын, ел болып сақталып қалу жолындағы ауыр да ардақты күресін терең толғаған көркемдік қуаты зор туынды. Одан бөлек, аудан жастары арасында «Алакөл жастары – кітап әлемінде» атты байқау ұйымдастырылып, Бауыржан Момышұлының «Ұшқан ұя», Смағұл Елубаевтың «Ақ боз үй» романы және Мұқағали Мақатаевтың өлеңдер жинағы таңдалды. Байқау жастардың қызығушылығын арттыруды, ұлттық әдебиеттің інжу-маржандарын насихаттауды және кітап арқылы ұлттық құндылықтарды ұлықтауды мақсат етеді.
Елімізде басталған «Кітап оқитын ұлт» республикалық кітап оқу марафонын кезекті әдеби байқау немесе белгілі бір мерзімде 15 кітап оқып шығуға үндейтін науқан ретінде ғана қабылдау жеткіліксіз. Оның ар жағында әлдеқайда үлкен мақсат – кітап оқуды ұлттық дағдыға айналдыру, қоғамның зияткерлік әлеуетін күшейту, ойлайтын, ізденетін, алған білімін өмірде қолдана білетін зерделі ұлт қалыптастыру идеясы тұр. Осы орайда орталық кітапхана мамандары аудандық почта бөліміне, аудандық ауруханаға, №5 психологиялық-педагогикалық түзеу кабинетіне, «Жансая» күндізгі болу орталығы-ондағы бөлімшесіне, балалар шығармашылық орталығына, Алакөл ауданының қорғаныс істері жөніндегі бөліміге, №40398 әскери бөліміне, аудандық шекара басқармасына, аудандық «Мансап» орталығына арнайы барып, түсіндірме жұмыстарын өткізуде.
Қазіргі заман – ақпарат пен технологияның дамыған кезеңі. Интернет, әлеуметтік желілер, түрлі электронды құрылғылар адамның өмірін жеңілдетіп, ақпаратқа қол жеткізуді оңайлатты. Осындай жылдам өзгеріп жатқан қоғамда кейбір адамдар кітаптың маңызы азайып барады деп ойлауы мүмкін. Алайда шын мәнінде кітап – адамзаттың рухани дамуы мен білімінің негізгі қайнар көзі болып қала береді.
Айгүл БОДАУОВА,
