Қазақ тарихында қаһармандығымен қалған қайраткерлер көп. Солардың басында Қаракерей Қабанбай батыр тұр. Қазақ әскеріне қолбасылық жасап, Дарабоз атанған қаһарманның туғанына 330 жыл толуына орай өткізілген ғылыми-тәжірибелік конференцияның материалдары мен жыр мүшәйрасына қатысқан ақындардың өлеңдері жинақталып, «Дарабоз батыр – Қаракерей Қабанбай» деген атпен кітап болып жарық көрді.
400 беттік ауқымды еңбектің тұсаукесері Талдықорғандағы С. Сейфуллин кітапханасында өтіп, көпшілікті бір серпілтті.
Белгілі ақын Жангелді Немеребай ашып, жүргізіп отырған салтанатты шарада облыстық ардагерлер кеңесінің төрағасы Ермек Келемсейіт, халықаралық «Алаш» әдеби сыйлығының иегері Әміре Әрін, Қазақстанның Құрметті жазушысы Нүсіпбай Әбдірахым, айтыскер ақын, «Парасат» орденінің иегері Айтақын Бұлғақов және кітаптың шығуына мұрындық болған медицина ғылымдарының докторы, профессор Мақсұт Қалажанов, «Jetisý» газетінің бас редакторы Жұматай Оспанұлы кезекпен сөз алып, Абылай ханнан Дарабоз атын алған Қабанбай батырдың өмір жолын, ерлігін, қайраткерлігін өскелең ұрпаққа дәріптеудің маңызы мен мәніне тоқталып, рухани тәлім-тәрбиенің қажеттілігін алға тартты.
Тұсаукесері өткен кітаптың 100 данасы облыстық кітапхананың қорына табысталды.
«Жетісу-Ақпарат»
Суреттерді түсірген Жұмабай Мұсабеков
