Жетісу облысының шекара шебінде ақиық ақын Мұқағали Мақатаевтың туғанына 95 жыл толуына орай «Аққулар ұйықтағанда» атты тағылымды әдеби кеш ұйымдастырылды, – деп хабарлайды 7-su.kz ақпараттық порталы.
Алакөл ауданы бойынша шекара басқармасында өткен шараның басты мақсаты – отан қорғаушылардың бойындағы патриоттық сезімді ұлттық әдебиет арқылы шыңдап, рухани құндылықтарды дәріптеу. Мұқағали жырларының құдіреті шекарашылардың рухын көтеріп, ана тіліне деген сүйіспеншілігін арттыра түсті.
Әдеби жиынға Бұлақты ауылы орта мектебінің қазақ тілі мен әдебиеті пәнінің мұғалімі, белгілі «Жыр ғұмыр» авторлық бағдарламасының иесі Жанат Аянбаева мен Алакөл ауданы әкімдігі аппаратының идеологиялық жұмыс жөніндегі маманы Айгүл Қияққызы қатысты.
Кеш барысында Жанат Аянбаева ақынның өмір жолы мен шығармашылығындағы беймәлім деректермен бөлісіп, оның жырларындағы шынайылық пен ұлттық болмыстың маңызын түсіндіріп берді. Ал Айгүл Қияққызы бүгінгі жас ұрпақ, соның ішінде ел шебін күзеткен сарбаздар үшін ақын мұрасының тәрбиелік мәні зор екенін атап өтті.
Кеш барысында шекарашы сарбаздар мен офицерлер ақынның отты жырларын жатқа оқып, «Аққулар ұйықтағанда» поэмасынан үзінділер келтірді. Мұндай іс-шаралар әскери қызметшілердің тек физикалық тұрғыдан ғана емес, интеллектуалдық әрі мәдени бағытта да дамуына жол ашады.
Мұндай мәдени кештер қоғамда және әскери ортада маңызды рөл атқарады. Мемлекеттік тілдің қолданыс аясын кеңейтіп, көркем сөйлеу мәдениетін қалыптастырады. Отанға деген сүйіспеншілік пен адалдық сезімін нығайтады. Шекара қызметі мен жергілікті зиялы қауым арасындағы шығармашылық сабақтастықты арттырады.
