Талдықорған қаласындағы №15 орта мектептегі «Ілиястану» оқу кабинетінің жұмыс жоспары аясында жас ұрпақтың рухани дүниесін байытуға бағытталған ерекше әдеби кездесу кеші өтті. Мектеп ұжымы мен оқушылардың қатысуымен ұйымдастырылған бұл шараға ақын, облыстық «Jetisý» газетінің бас редакторы Жұматай Оспанұлы арнайы қонақ ретінде шақырылды.
Мектеп мұғалімі, ұлағатты ұстаз Бірлікті Шәбденов жүргізген «Тәуелсіздік – тағдырым» тақырыбы аясындағы рухани басқосу шын мәнінде ерекше өтті. Мектептің мәжіліс залына жиналған жоғарғы сынып оқушылары кеш қонағын қошеметпен қарсы алды. Рухани шараның тізгінін ұстаған Бірлікті Шәрімбайұлы еркін елдің ертеңі болатын жас ұрпаққа Жұматай Оспанұлын таныстырып, бірден тақырып аясында сауалын қойып, әңгімені бастап берді. Ақын, журналист ағамыз тәуелсіздік ата-бабамыздың асыл мұраты болғанын, бүгінгі ұрпақтың маңдайына бұйырған Тәңірдің берген ұлы сыйы екенін айта келіп, ақиық ақын Мұқағали Мақатаевтің «Бабаларым, рахмет сендерге» өлеңін тебірене оқып берді. Мектеп оқушылары да шайыр өлеңдерінен құралған әдеби композициямен сыбаға ұсынды.
Жас өрендер ақын шығармаларындағы терең мағына мен сырды көрерменге айрықша әсермен жеткізе білді. Кездесу барысында жүргізуші қойған сауалдар аясында ақын өзінің балалық шағынан басталған шығармашылық жолы, алғашқы өлеңдерінің туу тарихы, поэзияға келген кезеңдері туралы әсерлі әңгіме өрбітті. Жиын емен-жарқын еркін әңгіме ауанында өтті. Оқушылар ақынға көкейдегі сауалын қойып, өнер мен өлеңге қызығушылықтарын көрсетті.
Жұматай Оспанұлының тек қаламгер емес, қоғамдық өмірде де белсенді екенін айтып, қайырымдылықпен айналысатыны жайлы да сұрап, замандас достарымен бірлесе құрған «Жетісу – Шапағаты» қорының жұмысымен де танысты. Ақын, «Egemen Qazaqstan» газетінің Жетісу облысындағы меншікті тілшісі Мұхтар Күмісбек екеуі жүргізіп келе жатқан «Мизам» жылжымалы әдебиет мектебі жайлы да тағылымды әңгіме тыңдады.
Ақын өз сөзінде шығармашылық жолының қалыптасу кезеңіне тоқталып, поэзияға жетелеген бала күнгі ұстаздарының еңбегі жайлы да тебірене толғады. Орайы келген сәтте Бірлікті ағай Жұматай Оспанұлының бір кездері айтысқа қатысқанын алдыға тартып, табан астында суырып салып арнау айтуын өтінді. Өзімен бірге ала келген қоңыр домбырасын қолға алған ақын толғай тартып, жыр шумақтарымен шашу шашты. Біздің мектепке, ондағы ұстаздар мен оқушыларға деген ақ тілегін ақ бұлақтай ағылған жыр жолдарымен жеткізді. Оқушылар ғана емес, залда отырған ұстаздар қауымы да ақынның суырып салмалық қасиетіне тәнті болды. Тіпті, Бірлікті Шәрімбайұлы: «Жарты ғасырға жуық тарихы бар мектебімізге суырып салып жыр арнаған тұңғыш ақын ретінде білім ордасының тарихында қалатын болдыңыз» деп әзілмен айрықша қошеметін көрсетті.
Кездесу барысында оқушылар ақынның кітаптарымен танысты. Мұндай рухани шара жасөспірімдердің әдебиетке деген қызығушылығын арттырып қана қоймай, ұлттық құндылықтарды дәріптеуге, шығармашылық ізденіске жетелеуге зор ықпал етеді. Мектеп ұжымы оқушылардың рухани-мәдени дамуын қолдау бағытындағы осындай игі бастамалардың алдағы уақытта да жалғасын табатынын атап өтті. Кеш соңында мектебіміздің «Кездесу» вокалды-аспаптық ансамблі мен 4 «Б» сынып оқушылары қадірлі қонағымызға және де жүрегі Тәуелсіздік деп соғар залда отырған әрбір қазақ азаматына арналған «Алға, қазақ жігіттері!» әнін орындады.
Сонымен бірге «Орамал тон болмайды, жол болады» деген қазақы пейілмен кәсіподақ ұйымының төрағасы Нұржан Дәуітбекұлы қонағымыздың иығына шапан жауып, құрмет көрсетті. Осылайша «Мың күніме татиды, осы отырған бір күнім» деп халық әнінде айтылғандай, есімізде ұзақ сақталатын рухани кеш мәресіне жетті.
Дидар Тоқтарбайұлы,
№15 орта мектептің қазақ тілі мен
әдебиеті пәнінің мұғалімі
Талдықорған қаласы
