Бикен Римова атындағы Академиялық драма театрында белгілі драматург Батырхан Дәуренбековтың «Тоқты мен Серке» атты ертегісінің премьерасы көрермен назарына ұсынылды. Балаларға арналған бұл жаңа қойылым жас көрермендерге көтеріңкі көңіл күй сыйлап қана қоймай, олардың бойына ізгілік, достық, батылдық пен адалдық секілді асыл қасиеттерді сіңіруді мақсат етті.
Премьера күні театр залына жиналған бүлдіршіндер мен ата-аналардың қарасы қалың болды. Ертегі желісіне құрылған қойылым басталған сәттен-ақ балалардың қызығушылығын оятып, олардың назарын бірден өзіне аударды. Кейіпкерлердің әсерлі ойыны, сахналық қимыл-қозғалыстар, әсем декорация мен жарқын костюмдер көрініске ерекше әр берді. Музыкалық сүйемелдеу мен жарық эффектілері де қойылымның көркемдік деңгейін арттырып, ертегілік атмосфераны айқын сезіндірді. «Тоқты мен Серке» ертегісінің негізгі идеясы – достыққа адал болу, бірлік пен ынтымақты сақтау, қиындыққа мойымай, батыл әрекет ету. Қойылым барысында Тоқты мен Серкенің басынан кешкен түрлі қызықты оқиғалары арқылы балаларға өмірлік маңызды құндылықтар көркем түрде жеткізілді. Қиын сәттерде бір-біріне қолдау көрсетіп, өзара сенім мен түсіністік танытқан кейіпкерлердің әрекеті жас көрермендерге үлкен өнеге болды. Қойылымда театр әртістері өз шеберліктерін барынша таныта білді. Әсіресе басты кейіпкерлердің сахнадағы табиғи ойыны, эмоцияға толы диалогтары мен қимыл-қозғалыстары көрермен көңілінен шықты. Премьераны тамашалауға келген балалар көрермендері де өз әсерлерімен бөлісті. Көрініс соңында залда отырған бүлдіршіндер ұзақ қол соғып, кейіпкерлерді сахнадан жібергісі келмеді. Көпшілігі қойылымның қызықты әрі көңілді болғанын айтып, сүйікті кейіпкерлерін атап өтті. Ата-аналар да балаларға арналған осындай тәрбиелік мәні зор спектакльдердің жиі қойылуы қажет екенін жеткізді. Мұндай мәдени шаралар жас ұрпақтың өнерге деген қызығушылығын арттырып, олардың рухани-эстетикалық талғамын қалыптастыруға зор ықпал етеді.
Жалпы, Батырхан Дәуренбековтың «Тоқты мен Серке» ертегісі негізінде сахналанған бұл қойылым Бикен Римова атындағы Академиялық драма театрының балаларға арналған репертуарын толықтырып, көрерменге көтеріңкі көңіл күй сыйлаған жарқын мәдени оқиғаға айналды. Тәрбиелік маңызы жоғары, мазмұны терең, көркемдік шешімі үйлесімді спектакль жас көрермендердің жүрегінен орын тауып, олардың театр өнеріне деген сүйіспеншілігін арттырары сөзсіз
Айдана АМАНЖОЛҚЫЗЫ,
ЖУ студенті
