Ел тәуелсіздігінің 30 жылдығына орай облыс басшылығының қолдауымен жарық көрген «Құрмет» және «Парасат» ордендерінің иегері, экономика ғылымдарының докторы, профессор Серікбай Нұрғисаевтың «30 жыл – Тәуелсіз елдің мемлекеттік қызметінде» атты кітабының тұсаукесері облыс әкімдігі мен облыстық мәдениет, архивтер және құжаттама басқармасының ұйымдастыруымен Талдықорғандағы Салтанат сарайында өтті. Бұл туралы «Жетісу» газеті хабарлады.
Шараны жүргізген облыс әкімінің бірінші орынбасары Лаззат Тұрлашов алдымен Серікбай Өрікбайұлының қызмет жолын айта келіп, әр жылдардағы ел мен жер үшін істеген еңбегіне тоқталды. Тәжірибесі мол, көрген-білгені көп азаматтың қызмет жолында түйгенін түртіп отыруы да өзінен кейінгі қызметкерлерге үлгі.
Өз сөзінде Лаззат Махатұлы: «Тек қана облысымыздың емес еліміздегі мемлекеттік қызметті жан-жақты түсіндіретін кітап – жас қызметкерлерге жолбасшы болатындығына сеніміміз мол. Серікбай Өрікбайұлының ел үшін сіңірген еңбегі ерен. Әлі де берері мол азамат», – деп айрықша атап өтті. Одан кейін шараның негізгі бөлігінде кітаптың лентасын Жетісудағы ардагерлер кеңесінің төрағасы Ермек Келемсейіт пен философия ғылымдарының докторы, профессор Аманжол Қасабек қиды.
Кітап облыс басшысы Амандық Баталовтың қолдауымен «Жетісу кітапханасы» сериясы бойынша ЖК «GALAXY» баспасынан бес жүз данамен шықты. Кітаптың мұқабасында елордамыздың ғана емес, егемендігімізден кейінгі еліміздің символдарының біріне айналған бәйтеректің суреті берілген. Жалпы 287 беттен тұрады. Кітапта 60-тан астам тақырып қамтылған.
Мәселен, «Мемлекеттік қызметшінің әдебі», «Ар алдындағы жауапкершілік бәрінен биік», «Билік пен БАҚ байланысы», «Мемлекеттік қызметші атанудағы алғашқы қадам» сияқты материалдар топтастырылған. Бұл тұрғыда кітап авторы Серікбай Өрікбайұлы:
– Жас мемлекеттік қызметкерлерге, мемлекеттік қызметке келуді жоспарлап жүрген студенттерге керек кітап болады деп есептеймін. Өйткені, мемлекеттік қызмет турасында тәжірибені сабақ есебінде үйрететін оқулықтар қатары жоқтың қасы. Сондықтан да, кәдеге жарайды деген ойдамын, – деді.
Рас, оқу құралы көпке көмек болып, дұрыс бағыт-бағдар көрсететіндігіне сенеміз. Сөз кезегі келгенде профессор Аманжол Қасабек автордың осыған дейінгі он жыл бұрын жарық көрген кітабымен салыстыра келіп: «Әр онжылдықтың тарихын түгендеп, мемлекеттік қызметтің жай-жапсарын жазып отыру – автордың ерекшелігі және мемлекеттік қызметті толық бақылауға алып, сүзгіден өткізіп жазуында», – деді.
Шара соңында елге белгілі эстрада әншісі Гүлнұр Оразымбетова ән айтып, кітаптың тұсаукесерін көңілді нотада аяқтады.
Серік ҚАНТАЙ
Алматы облысы
