Кітапхана саласында бірнеше жыл бойы табанды еңбек етіп келе жатқан Рауан Әуесбекұлы өз ісіне адал, жаңашыл мамандардың бірі. Ол ерекше қажеттілігі бар жандарға арналған ақпараттық және мәдени қызмет түрлерін жаңаша форматта ұйымдастырып, инклюзивті мәдени ортаны дамытуға зор үлес қосып келеді. Оның бастамасымен кітапханада тифлокомментаторлық және сурдоаударма қызметтері енгізіліп, көру және есту қабілеті шектеулі оқырмандарға арналған арнайы оқыту бағдарламалары жүзеге асырылған. Бұған қоса, үздік қызметкердің жетекшілігімен «Кедергісіз болашақ» жобасы іске қосылып, сандық ресурстар мен аудиокітаптар қоры айтарлықтай толығып отыр. Бұл игі бастамалар ерекше жандардың рухани бай болуына жол ашып, білім мен мәдениет кеңістігіне тең құқылы араласуына мүмкіндік береді.
– Бұл жеңіс тек менің еңбегімнің емес, барша әріптестерімнің ортақ табысы. Біздің басты мақсатымыз – әрбір азаматтың кі- тапханаға еркін келіп, рухани байлыққа қол жеткізуіне жағдай жасау, – дейді ол.
«Рухани қазына – 2025» фестивалі еліміздің мәдениет қызметкерлерінің еңбегін бағалайтын, олардың шығармашылық әлеуетін көтеретін маңызды кәсіби алаң. Осындай жобалар арқылы қоғамда мәдени инклюзия идеясы кеңінен насихатталып, рухани құндылықтардың жаңа қырлары ашылуда.
Гауһар ЫСҚАБАЙҚЫЗЫ
