Жыр алыбы Жамбыл Жабаевтың туғанына 180 жыл толуына орай Жаркент қаласындағы Жамбыл атындағы орта мектепте XX ғасырдың Гомеріне арналған арнайы кабинет ашылды, – деп хабарлайды 7-su.kz ақпараттық порталы.
Айтыс өнерінің абызы, жырдың жампозы атанған ақын мұрасын ұлықтау мақсатында өңірде тәрбие сағаттары, жас талапкерлер айтысы, ұлттық ойындар ұйымдастырылды.
Мектеп директоры Гульвира Муфтахтинованың айтуынша, білім ордасында білім алатын көпұлтты шәкірттер қауымы қаламгердің өлеңдерін жатқа оқып, түрлі байқауларда бақ сынаған. Нәтижесінде оқушылар республикалық деңгейдегі додада жүлдегерлер қатарынан көрінген.
Салтанатты жиынға ақын ескерткішіне гүл шоқтарын қоюдан басталып, аудан әкімінің орынбасары Еркебұлан Ақболатов пен ардагер ұстаздардың қатысуымен жаңа кабинет лентасының қиылуымен жалғасты. Заманауи үлгіде жабдықталған кабинетте жыраудың өмір жолынан сыр шертетін жәдігерлер, шығармалар жинағы мен көрнекі стендтер орналастырылған.
Шара барысында оқушылар сахналық қойылымдар ұсынып, жыр маржанын төгіп, сөз сүлейінің асыл мұрасын тағы бір мәрте жаңғыртты.
