Мемлекет басшысының тапсырмасына сәйкес, Қазақстан Республикасы Ауғанстан халқына кезекті гуманитарлық көмек жолдады. Көмек көлемі – 2,2 мың тонна.
Ауғанстанның Балх провинциясындағы Хайратон станциясында Қазақстан тарапынан жеткізілген гуманитарлық жүк ресми түрде табысталды. Көмек құрамына күнделікті қажетті азық-түлік және тұрмыстық тауарлар кірді:
-
Өсімдік майы
-
Бидай ұны
-
Күріш жармасы
-
Қысқы және жазғы шатырлар
-
Көрпелер
-
Зәру дәрі-дәрмектер (бір бөлігі әуе көлігімен жеткізіледі)
Бұл көмек «KazAID» Қазақстандық халықаралық даму агенттігінің қолдауымен ұйымдастырылды.
Достық пен ынтымақтастық жалғасады
Қазақстан Республикасының Ауғанстандағы уақытша сенімді өкілі Ғазиз Ақбасов:
«Қазақстан Ауғанстан халқымен достық байланысын жалғастырып қана қоймай, екіжақты сауда-экономикалық қатынастарды тереңдетуге мүдделі. Гуманитарлық қолдаудан бөлек, тау-кен өнеркәсібі, көлік, логистика мен ауыл шаруашылығы салаларындағы әріптестікке де дайынбыз», – деді.
Қазақстан делегациясы Кабулға барады
21–23 сәуірі аралығында вице-премьер – ұлттық экономика министрі Серік Жұманғарин бастаған делегация Кабул қаласына ресми сапармен барады. Іссапар аясында Ауғанстанның ресми тұлғаларымен екіжақты кездесулер өткізу, Қазақстандық өнімдердің көрмесін ұйымдастыру жоспарланып отыр.
«Жетісу-Ақпарат»
Фото: ortcom.kz
