Қазақстан биыл халықаралық маңызды диалогтар мен кездесулердің орталығына айналды, – деп хабарлайды 7-su.kz ақпараттық порталы.
Президент көмекшісі – Баспасөз хатшысы Руслан Желдібайдың мәліметінше, бір жыл ішінде елімізге шет мемлекеттердің басшылары 30 рет сапармен келген. Мәртебелі меймандардың қатарында ҚХР, Италия, Грузия, Өзбекстан, Словения, Вьетнам және БАӘ секілді елдердің жетекшілері бар. Сонымен қатар тізімде Руанда, Солтүстік Македония, Болгария, Словакия, Иордания, Конго Демократиялық Республикасы, Мьянма, Мажарстан, Әзербайжан, Финляндия, Эстония, Армения, Түрікменстан, Швейцария және Иран елдерінің мемлекет және үкімет басшылары кездеседі. Бұл көрсеткіш еліміздің сыртқы саясаттағы беделі мен ашықтығын айқын көрсетеді.
Биылғы дипломатиялық жұмыстардың ауқымы тек ресми сапарлармен шектелмейді. Мемлекет басшысы Қасым-Жомарт Тоқаев өзге елдердің президенттерімен 43 мәрте телефон арқылы маңызды мәселелерді талқылап, стратегиялық серіктестікті нығайтты. Бұдан бөлек, жыл ішінде өткен 4 ресми рәсімде 30 мемлекеттің жаңа елшілері өз сенім грамоталарын тапсырып, дипломатиялық қызметтеріне кірісті. Президенттің жұмыс кестесі де өте тығыз болды: ол өңірлер мен шет елдерге жасаған іссапарлары барысында 168 960 шақырым жол жүріп, жалпы есеппен 252 сағат уақытын ұшақта өткізген. Мұндай қарқынды жұмыс еліміздің халықаралық аренадағы позициясын бекемдеп, экономикалық байланыстарды жаңа деңгейге көтеруге бағытталып отыр.
