Облыс әкімі Бейбіт ИСАБАЕВ Қытай Халық Республикасының Алматыдағы Бас консулы Цзянь Вэй ханым бастаған қытай делегациясымен кездесті. Достық рәуіштегі басқосуда екі ел арасындағы ынтымақтастықты нығайту мәселелері талқыланды.
Аймақ басшысы Бейбіт Өксікбай- ұлы жер жаннаты Жетісу жеріне табан тіреген меймандарды жылы қарсы алып, өңірдің инвестициялық мүмкіндіктерін айтып, инвесторлар үшін барлық жағдай қарастырылғанын жеткізді. Екі ел президенттерінің сауда-экономикалық, мәдени және гуманитарлық қатынастарды жаңа сапалық деңгейге көтергенін тілге тиек етті. Нәтижесінде кейінгі уақытта Жетісу облысында Қытай Халық Республикасымен елеулі ынтымақтастыққа қол жетті.
– Киелі Жетісу жеріне қош келдіңіздер! Екі ел арасындағы достықты нығайтып, нәтижелі жұмыс істеу бәріміздің ортақ міндетіміз. Өздеріңіз білетіндей, біздің өңірдің Қытаймен жалпы шегарасы шамамен 563 км. Өткен жылы облыс пен ҚХР арасындағы тауар айналымы 3,8 миллиард АҚШ доллары немесе 1,7 триллион теңгені құрап отыр. Қытай біздің ірі экономикалық серіктесіміз, бұл ретте облыстың сыртқы тауар айналымындағы оның үлесі 89%-ды құрайды. Іргелес өңірлермен де қарым-қатынастар белсенді дамып келеді. Мәселен, өткен жылы біздің облыс пен ШҰАА арасында бауырластық байланыстар орнату туралы келісімге, «Қорғас» ХШЫО қызметін үйлестіру тетігін құру жөніндегі меморандумға және сауда-экономикалық ынтымақтастық туралы келісімге қол қойылды, – деді кездесуді ашқан аймақ басшысы.
Облыстың көлік-логистикалық әлеуетіне ерекше назар аударған облыс басшысы ауылшаруашылығы өнімдерін қайта өңдеу, баламалы энергетика секілді ынтымақтастықтың перспективалы бағыттарына да кеңінен тоқталды.
– Жетісу облысы 5 кеден бекеті бар республикадағы жалғыз өңір екенін ерекше атап өткен жөн. «Алтынкөл» кеден бекетінің өзінен 2023 жылы 343 мыңнан астам көлік құралы өтті. Ал «Достық» стансысында, «Достық-Алашанькоу» шегаралық өткелімен тікелей жақын жерде өткізу қуаты жылына 3,9 миллион тонна немесе 300 мың контейнер болатын көпфункционалды жүк тасымалдау терминалдары жұмыс істейді. Қазір «Достық» стансысында «Алакөл» автомобиль өткізу пунктін кеңейту мен жаңа терминал салу жұмыстары жүргізілуде. Бұл жұмыс нәтижесінде жолақтар саны 6-ға артып, өткізу қабілеті тәулігіне 200-ден 1600-ге дейін артады. «Достық – Мойынты» теміржол желісінің екінші желісін салу ірі жобасы «Достық» стансысының өткізу қабілетін арттыруға мүмкіндік береді. «Қорғас – Шығыс қақпасы» АЭА экономикалық өсімнің кепілі. Тәулігіне 1400 вагонды өңдеуге жағдай жасайтын Құрғақ порт жұмысы бүгінде жемісті атқарылуда. Екі ел арасындағы «Қазақстан – Қытай халықаралық қаласы» ең ірі инвестициялық жоба екенін ескергеніміз жөн. «Қорғас» ХШЫО шегара маңы ынтымақтастығының тағы бір маңызды бағыты. Бұл ел экономикасының дамуына оң әсерін тигізуде. Алдағы уақытта біз бірлескен жаңа инвестициялық жобаларды жүзеге асыруға, нәтижелі жұмыс істеуге дайынбыз, – деді аймақ басшысы.
Достық рәуіштегі кездесуде Бас консул Цзянь Вэй ханым төртінші кездесудің ынтымақтастықтың нығая түскенінің белгісі екенін айтты. Жылы қабылдап, ерекше ілтипат білдірген облыс басшысына алғысын білдірді. Сондай-ақ, Цзянь Вэй ханым шегара маңындағы ынтымақтастықтың аясын одан әрі кеңейту мәселелері мен мүмкіндіктеріне егжей-тегжейлі тоқталып, әріптестік байланысты дамытуға толықтай дайын екендіктерін жеткізді.
Қытай Халық республикасының Алматыдағы Бас консулы Достық үйіне барып, облыстық Қытай «Күміс тамыр» этномәдени орталығы» қоғамдық бірлестігінің жұмысымен танысты. Одан кейін жұмыс тобы Алакөл ауданына сапарлап, «Достық» бекетіндегі өткізу пунктіне барады.
Еңлік КЕНЕБАЙ
