Қазақстан Республикасы Президентінің Кеңесшісі Мәлік Отарбаев Көксу ауданына жұмыс сапарымен келді. Аудан ардагерлерімен, дін қызметкерлерімен және жалынды жастармен кездесті.
Ең әуелі Мәлік Нұржанұлы көксулық ардагерлермен кездесіп, Ұлттық құрылтай жайында әңгіме өрбітті. Қазіргі жаһандану дәуірінде саналы ұрпақ тәрбиелеу, жастарды кітап оқуға ынталандыру, қоғамдық сананы дамыту бағытындағы ойларын ортаға салды. Мәлік Нұржанұлы ауылдың қоғамдық өміріне белсене араласып, түрлі салада еңбек етіп, үлгі-өнеге болып жүрген ардагерлер қауымына алғысын жеткізіп, Мемлекет басшысының ауқымды реформалары және Ұлттық құрылтайдағы жан-жақты идеялары мен бастамалары туралы да сөз қозғады. Ол Президент бастамаларының қоғамға қозғау салып жатқандығын баяндады.
– Президент Қасым-Жомарт Тоқаев өткізген Жалпыұлттық құрылтайда көтерілген мәселенің барлығы да еліміздің ертеңіне бағытталды. Экономика, азаматтардың өмір сүру сапасын жақсарту, өңірлерді кешенді дамыту, жастар тәрбиесі, олардың бүгінгі беталысы сынды тақырыптар Мемлекет басшысының Құрылтайда сөйлеген сөзінде басты назарында болды. Сондықтан да біз бәріміз бірге жаңа Қазақстанның дамуы жолында бірігіп еңбек етуіміз қажет. Дәл қазір еліміздің бірқатар өңірінде табиғи апаттар орын алуда. Осы тұста бәріміз бір атаның баласындай атсалысып, қайғыға ортақтасудамыз. Бұл біздің елдігімізді, бірлігімізді аңғартады, – деген Мәлік Нұржанұлы көпшілікті бірлікке, татулыққа шақырды.
Аудан ақсақалдары атынан қоғам қайраткері, Жетісу облысының Құрметті азаматы Жомартқали Жексембинов сөз алып, келелі кездесудің маңыздылығына тоқталды. «Әр қазақ менің жалғызым» деп сөз бастаған ақсақал қажет болса облыс орталығындағы баспанамды апаттан зардап шеккен отбасына беретінін айтып, елдің амандығын тіледі.
Елдегі апаттың алдын алу үшін бірқатар жүйелі жұмыстарды орындау қажеттігін айтқан қоғам қайраткері, Алматы облысының Құрметті азаматы Наурыз Қылышбаев арнайы жұмыс сапарымен келген мейманның жұмысына береке тілеп, аудан жұртшылығының ыстық ықыласын Мемлекет басшысына жеткізуді тапсырды. Жасында бейнет етіп, бүгінде зейнетін көріп отырған ел ағалары ауданда атқарылған әр іске ақылын айтып, бағасын беріп, ауданның өсіп-өркендеуіне зор ықпалын тигізуде.
Мәлік Отарбаев ауданның дін қызметкерлерімен кездесіп, мешітке келген жамағатқа қазақтың ақын-жазушыларының да шығармаларынан түрлі мысалдар келтіріп, діни білімдерін арттыру туралы ұсыныс жасады. Сонымен қатар, мешіт бұрышындағы кітап сөрелеріне де қазақтың зиялы қауымының шығармалары да қойылса деген ниетін білдірді. Деструктивті діни ағымдардың алдын алу үшін дін қызметкерлері қоғаммен белсене араласуы қажет екенін тілге тиек етті.
Ауданның Мәдениет үйінде жастармен ашық диалог құрған Мәлік Отарбаев заман талабына сай жастарға білімдерін шыңдауға, ақпараттық сауаттылықты арттыруға кеңес берді. Әсіресе, жастарды кітап, газет-журнал оқуға шақырды. Заман талабынан туындаған қажеттіліктер мен ұлттық құндылықтың басымдығы, жаһанданудың ықпалы мен ұлттық тәрбиенің өзегін ажыратудың маңыздылығы, дұрыс әрі құнды мақсат қоюдың жастарды кәсіби тұрғыдан өсіретінін жеткізді. Әр адамның басты бағдаршамы кітап болу керектігін баса айтқан Президент кеңесшісі елімізде өткізіліп жатқан саяси науқанға еліміздің жастары да өз үлестерін қосу керектігін тілге тиек етті.
– Жалынды жастар үнемі білім алуға құштар болуы керек. Сіздерге үлгі болатын ол біздің Президентіміз. Бес тілде еркін сөйлеп, газет-журналдарды мұқият оқып, көтерілген ауқымды мақалалардың астын сызып, сол мәселеге көңіл бөлу қажеттігін жауапты мамандарға тапсырып отыруының өзі үздіксіз ізденістің, еңбекқорлықтың көрінісін көрсетеді.
Кім болашаққа сеніммен қараса, соның болашағы жарқын. Ал кім күмәнмен қараса, оның өмірі де күмәнді, ала-құла күйде өтеді. Сондықтан, келешекке сеніммен қараңыздар», – деген Мәлік Нұржанұлы жас ұрпақтың көздеген мұраты асыл, мақсаты биік болуы керектігін алға тартты.
Көксулық белсенді жастар көкейінде жүрген сұрақтарын қойып, пікір алмасты.
Еңлік КЕНЕБАЙ
