Талдықорғанның төрінде «BIKEN FEST — 2024» Халықаралық театр фестивалі басталды. Халық әртісі, КСРО және Қазақстан Мемлекеттік сыйлығының иегері, Қырғызстанның еңбек сіңірген мәдениет қайраткері, театр және кино актрисасы Бикен Римова атындағы дүбірлі өнер додасының ашылу салтанатына облыс әкімі Бейбіт Исабаев арнайы қатысып, ізгі тілегін білдірді.
Бикен Римова атындағы драма театрдың киелі сахнасындағы салтанат арнайы дайындалған бейнефильммен бастау алды. Онда кино мен театр өнерінде өшпес қолтаңба қалдырған, ана, әйел образын ерекше сомдаған Би апаның түскен фильмдері көрсетілді. Өз кезегінде еліміздің танымал тұлғалары мен алыс-жақын шет елдерден келген сарапшылар құрамы журналистермен жүздесті. Еркін сұқбат құрып, өнер байқауына сәттілік тіледі.
Фестивалдың ашылу салтанатында алғашқы болып сөз алған облыс басшысы Бейбіт Исабаев:
– Бұл өнер мерекесі – шығармашылықтың, мәдениеттің және ұлттық дәстүріміздің жарқын көрінісі. «Театр – хас сұлудың көз жасындай мөлдір өнер», – деп Ғабит Мүсірепов айтқандай, шынымен бекзат өнерге бас иеміз, жүрегімізді нұрландырып, жан дүниемізді байытамыз. Ерекше талантымен ел есінде қалған Халық әртісі Бикен Римова апамыздың атындағы бұл фестиваль биыл екінші мәрте ұйымдастырылып отыр. Өнер майталмандары мен әлемнің түкпір-түкпірінен келген талантты өнерпаздардың басын қосатын, рухани шараның орны бөлек. «Өнерде шекара жоқ». Биылғы фестивальға алыс-жақын бауырлас елдерден Түркия, Грузия, Қырғызстан мемлекеттерінен келген және еліміздің айтулы театрлары қатысып, барлығы 8 театр өз өнерлерін көрсетеді. Шәкен Айманов: «Театр – адамның өзін-өзі сахнадан көріп, өзін-өзі түсінетін орын» деген екен. Сіздердің тамаша өнерлеріңіз көрерменді рухани кемелдендіріп, ерекше ләззат сыйлары сөзсіз, – дей келе ұлы классиктер шығармалары мен бүгінгі жастардың қаламынан шыққан үздік туындылар театр сахнасынан көрерменге жол тарта берсін деген тілегін білдірді.
Аймақ басшысының ізгі тілегінен кейін облыстық Д. Рақышев атындағы филармония өнерпаздары күй күмбірлетіп, би биледі. Қазақ өнері салтанат құрған сахнаға байқауға қатысатын театр ұжымдары арнайы шақыртылып, көрерменге таныстырылды.
Айта кетерлігі, екінші мәрте өтіп отырған халықаралық фестивалге жалпы саны 8 театр қатысуда. 4 күн бойы көрерменді тағылымды қойылыммен сусындаттар дүбірлі додада Грузия елінің В. Гуния атындағы Поти мемлекеттік драма театры, Түркия елінің Эрзурум мемлекеттік театры, Қ. Жантөшев атындағы Ыстықкөл облыстық музыкалық драма театры (Қырғызстан), сондай-ақ еліміздегі Жамбыл облыстық орыс драма театры, С. Қожамқұлов атындағы Ұлытау облысының қазақ музыкалық-драма театры, Х. Бөкеева атындағы Батыс Қазақстан облыстық қазақ драма театры, Б. Омаров атындағы «Жас сахна» театры мен Би апа атындағы Талдықорған драма театры өнер көрсетпек.
Асыл СҰЛТАНҒАЗЫ
Суреттерді түсірген Жеңіс Ысқабай
