Мемлекет басшысы Қасым-Жомарт ТОҚАЕВ мұсылман қауымды Ораза айт мейрамының басталуымен құттықтады. Бұл туралы «Ақорда» хабарлады. Өз сөзінде ол сабыр мен төзімділікке толы Рамазан айының арқасында коронавирус індетіне байланысты ахуал біршама тұрақтанғанын жеткізді. Толық мәтіні төмендегідей:
Құрметті отандастар! Сіздерді Ораза айт мерекесімен шын жүректен құттықтаймын!
Бұл – ислам әлеміндегі айтулы әрі қастерлі мейрам. Ораза айт рухани тұрғыдан жаңаруға және кемелденуге үндейтін қасиетті Рамазан айына жалғасып, жақсылыққа жетелейді.
Имандылықпен берік үндес адамгершілік пен бауырмалдық, қарапайымдылық пен кішіпейілділік – ұлттық тәлім-тәрбиенің бастауы. Оны бүгінгі ұрпақтың өмір салтына айналдыруымыз керек.
Мейрам күндері күллі мұсылман қауымы бір-біріне қамқорлық жасап, мұқтаж жандарға қолдау көрсетеді. Мұндай игі істер біздің ырыс-ынтымағымызды арттыра түседі.
Рамазан айында сабыр сақтап, төзімділік танытқанымыздың арқасында індетке байланысты қалыптасқан ахуал біршама тұрақтанды. Халқымыздың парасаты мол, бірлігі бекем болса, бұл сынақтан да сүрінбей өтеміз деп сенемін.
Ораза айт құтты болсын! Баршаңызға зор денсаулық, бақ-береке және толайым табыс тілеймін!
Қасым-Жомарт ТОҚАЕВ,
Қазақстан Республикасының Президенті
Сурет — ғаламтордан
