Жалпы, қазақ елі тарихтан бері тәуелсіз ел. Адамзат өркениеті қалыптастырған мемлекеттік тарихтың мыңжылдықтарында осынау даладағы ұлы империялар біздің ата-бабаларымыздың алақанында болғанын әлем бүгін мойындап отыр. Әлі де жылдар жылжып, архивтер парақталған сайын талай ақиқаттар айқындала түсетіні анық. Десе де, биыл Қазақстан Республикасы тәуелсіздігінің 30 жылдығын қарсы алып отырмыз. «Сонда біз кімнен тәуелсіздік алдық?» деген сұрақ алдыңнан шығады.
Менің пайымымша, біз Ресейден тәуелсіздік алған жоқпыз. Ресейдің де тәуелсіз ел болғанына 30 жыл болды. Қысқасы, бәріміз коммунистік утопиялық идеядан, тоталитарлық-билікшіл жүйеден тәуелсіздік алған елдерміз. Бірнеше мыңжылдықта адамзат тарихының доңғалағын алға жылжытқан талай идеялар болды. Ол «Тәурат», «Забур», «Інжіл», «Құран» деген атаулармен Жаратушыдан жіберілген, көктен түскен алып идеялар. Сол қасиетті кітаптардағы тәлімді ойлар адамзат баласын әліге дейін алға жетелеумен келеді. Ал коммунистердің қолымен жер бетінде жасалған утопиялық жоспарлар бар-жоғы бір ғасырға жетпейтін уақытта өзінің өмір сүруін тоқтатты. Жетістіктер болған шығар. Бірақ өміршең бағыт еместігін уақыт өзі-ақ көрсетті. Яғни, коммунистік режимнің қыспағындағы елдер сол жүйеден сытылып шығып, өзінің байырғы дәстүрлі пәлсапасына, мемлекет құру даңғылына қайта түсті.
Иә, аз уақыт арасында елімізде көп өзгеріс болды. Әрине, жетістік бар жерде кемшіліктің де болатыны түсінікті. Салыстырмалы түрде тәуелсіздіктің 30 жылында еліміз отыз ірі жетістікке жетті десек, жетіспеген тұсымыз небәрі бестен аспайды. Демек, жеткеніміз көп, табысымыз еселеніп келеді. Әрине, бұл жетістіктерді Елбасы Нұрсұлтан Назарбаевтың салиқалы саясатынан бөліп қарастыруға болмайды. Ал алдымызда кемшіліктерді жоюдың ауыр міндеттері тұр. Оны Президент Қасым-Жомарт Тоқаевтың «Сабақтастық. Әділдік. Өрлеу» сынды үш бағытын алдағы елдік бағытымыздың бағдаршамы еткенде ғана түзете алатынымызға кәміл сенемін. Демек, Мемлекет басшысы мақсат еткендей, өмірімізді өткен тарихтың шұғылалы істерімен сабақтастыра білсек, әділдік салтанат құрған ел құрсақ, берекелі отбасы, мерекелі жағдайларды өрлете білсек, Мәңгілік елдіктің тұғырынан таймайтынымыз анық.
Наурыз ҚЫЛЫШБАЕВ,
Алматы облысының Құрметті азаматы
