Ұлы аңсарымыз болған еркіндікті еңсеріп, бейбіт аспан астында берекелі ғұмыр кешіп келе жатқанымызға отыз жыл толды. Тауанды тарихымыз үшін қас қағым сәт саналатын осы уақыт ішінде мемлекетіміздің жеткен жетістіктері толайым. Әлем халықтары алдында өзінің бет-бедері, абырой-беделін айшықтай білген Отанымыздың, халқымыздың өркениет өресінен табылуының негізгі арнасы Тәуелсіздікке барып тіреледі.
Аламаны атқа қонған алмағайып замандардан бері, қанды ғасырлардан бергі жылнамалар жылғасына көз жіберетін болсақ, текті елдің темірқазық тұтқан қастерлі дүниелері жазбаларда айрықша айшықталған. Хандық дәуірлерде ішкі-сыртқы жағдайларға байланысты ықпалды елге иық сүйеп, елдігімізді сақтаудың шарғыларын ойластырсақ, кейіннен бодандық бұғауына еріксіз көндіктік. Бұл шерлі шежіреміздің, тағдыр-талайымыздың үкімі болса керек. Дегенмен, аспан асты, жер үстінде еркін ғұмыр кешкен бабаларымыз сол тар құрсаудың көбесін қақырата сөгу жолында ұлы күрестерді, шырғалаң шайқастарды тудырды. Үздіксіз созылған сол ұлы ерліктердің арасында екі тізгін, бір шылбырын еншілеген ел атандық. Әрине, тарихтың сарғыш беттеріне таңбаланған дүниені айтып отыруым мүмкін, бірақ та біз әрбір өскелең ұрпаққа қастерлі Тәуелсіздігіміздің оңай жолмен келмегенін ұғындырып, санасына тектілік темірқазығы екенін мық шегедей нық қағуымыз керек.
Жүректегі толғанысты термелейтін болсақ, Тәуелсіздік атты ұлы тойымыз тұрғысында ғасыр- лар қойнауынан ой сабақтап, бүгінгі толайым табыс, асқақ жетістіктерді тоқтаусыз тізбектеуге болар. Бірақ мен егемендік таңының ен даламызға шуақ шашқан сәтінен бергі ең үлкен жетістігімізді діл мен дініміздің гүлденіп, шегарамыздың шегенделіп, Елордамыздың еңсе көтеруі дер едім. Сол санатқа күллі әлем еліне «бейбітшіліктің бесігі» деген атпен танылып, бас қаламыздың төрінде төрткүл дүние кеңесін, ұлы жиындарын өткеруімізді, ғарышқа қазақ перзенттерін ұшырып, сан түрлі әлемдік додада, сан тараулы жолда Отан атын асқақтатып келе жатқанымызды да қосуға қақылымыз. Бұл тұрғыда, мұның бәріне бастамашы болған біздің аңсап жеткен бақытымыз, келер ұрпақтың текті темірқазығы болар – Тәуелсіздік екені де даусыз!
Әділ АХМЕТОВ,
Қазақстанның еңбек сіңірген қайраткері
