Ел Президенті Қасым-Жомарт Тоқаев Алаштың анасы атанған Сырдың төрінде өткізген бесінші Ұлттық құрылтайда біраз мәселені ортаға салды.
Соның ішінде жолдарды жаңғырту туралы сөзі ел дамуына серпін беретін басты бағытты қолдау екені даусыз. Елдегі автокөлік инфрақұрылымын халықаралық стандарттарға сай ету, тек тас жол салу ғана емес, бұл Қазақстанның транзиттік әлеуетін арттыруға, облыстар арасындағы байланысты нығайтуға бағытталған стратегиялық қадам. Жол – адам ағзасының ең маңызды бөлігі күретамыр іспетті. Күретамыр алпыс екі тамырымызға нәр беріп, сол арқылы бойымызға қан келіп тұратыны сияқты, жол – тіршілігімізге де жан беретін маңызды құрылым.
Қызылорда – Жезқазған, Қызылорда – Ақтөбе, Бейнеу – Сексеуіл сияқты бағыттарда жаңа күре жолдардың салынуы және ескі жолдарды кеңейту жұмыстары елімізді логистикалық тұрғыдан мықты әрі бәсекеге қабілетті етеді. Айталық, «Орта дәліздің» ұзындығын қысқарту арқылы Ақтау мен Құрық порттарына тікелей жол ашу нақты әрі тиімді нәтиже деп санаймын. Бұған дейін «мына жолмен барсаң, алыс болғанмен – жақын, мына жолмен жүрсең, жақын болғанмен – алыс» деп екіұдай сезімде тұрған жұртқа жаңылмай таңдау үшін де жолдың сапалы әрі тиімді болуы аса қажет.
Сарыағаш айналма жолы сияқты аймақтық жобалардың қолға алынуы да маңызды. Бұл жолдар тек көліктің қозғалысын жеңілдетіп қана қоймай, жол-көлік қауіпсіздігін арттырады және аймақтардағы экономикалық байланыстарға оң әсерін тигізеді. Ең маңыздысы – Президенттің барлық жобаны сапалы әрі уақытылы орындауды тікелей бақылауда ұстайтыны. Сөз бен іс үйлесім тапса, нәтиженің оңды болары сөзсіз.
Автокөлік инфрақұрылымы – бұл тек жол салу ғана емес, Қазақстанның халықаралық көлік-логистика орталығы ретіндегі әлеуетін нығайтуға бағытталған нақты стратегиялық қадам. Осындай нақты іс-қимылдар елдің дамуына айтарлықтай серпін береді деп ойлаймын.
Жұмахмет ЖАНАХМЕТҰЛЫ
Қазақстанның Құрметті журналисі
