Талдықорған қаласында «Мигрант» республикалық жедел-профилактикалық іс-шарасы аясында полиция қызметкерлері көші-қон заңнамасының сақталуын қамтамасыз етуге бағытталған кешенді тексеру жұмыстарын жүргізді, – деп хабарлайды 7-su.kz ақпараттық порталы.
Іс-шара барысында 27 шетелдік азамат анықталды. Тексеру нәтижесінде қабылдаушы тараптан заң бұзушылықтар тіркеліп, шетелдік жұмыс күшін және еңбек иммигранттарын заңсыз тарту фактілері белгілі болды.
Кінәлі тұлғалар Қазақстан Республикасының заңнамасына сәйкес жауапкершілікке тартылды. Құқық қорғау органдарының мәліметінше, көші-қонды бақылау қоғамдық қауіпсіздік пен тұрақтылықты қамтамасыз етудегі негізгі бағыттардың бірі болып қала береді.
– Заңға қайшы келетін әрекеттер, әсіресе көші-қон саласындағы құқық бұзушылықтар елдің ұлттық және аумақтық қауіпсіздігіне қауіп төндіреді. Осыған байланысты құқық қорғау органдары көші-қон заңнамасының сақталуына тұрақты бақылау жүргізуде, – деп атап өтті полиция өкілдері.
Қазіргі уақытта аталған бағыттағы профилактикалық жұмыстар жалғасуда. Полиция қызметкерлері түсіндіру шараларын жүргізіп, заң талаптарын сақтау қажеттігін ескертіп, құқық бұзушылықтардың алдын алу бойынша жұмыстарды күшейткен.
