Талдықорған қаласында 0-18 жас аралығындағы балаларға кешенді көмек көр- сететін «Tanym» жаңа түзету-дамыту орталығы ашылды.
150 баланы қабылдауға арналған орталық ерекше білім беру қажеттіліктері бар балаларды дамытуға және қолдауға бағытталған. Бұл жерде дефектолог, психолог, логопед, ABA-терапев сияқты түрлі бағыттағы мамандар жұмыс істейді. Сонымен қатар, балалар үшін нейрогимнастика, музыкалық-ырғақтық сабақтар, логомассаж, емдік және бейімделген дене шынықтыру, сондай-ақ, сенсорлық интеграция кабинеті мен тұз шахтасы қарастырылған.
Орталықта түзету сабақтарынан басқа мектепке дайындық топтары мен 1-4-сынып оқушылары үшін үй тапсырмаларын орындауға көмек көрсетіледі. Орталықтың негізін қалаушы және жетекшісі – әлеуметтік кәсіпкер Динара Қалиақпарова бірнеше жылдан бері өңірде инклюзивті білім беруді дамытып, ерекше қажеттіліктері бар балаларды қолдаумен айналысып келеді.
Орталықтың ашылуы облыстың білім беру жүйесі үшін маңызды оқиға болды. Шараға қатысқан облыстық білім басқармасы басшысының орынбасары Қайрат Қасымов орталық ұжымын жұмыстың басталуымен құттықтады. Сондай-ақ, ол бүгінде балаларға қажетті түзету және дамыту көмегін алуға көмектесетін тағы бір маңызды мекеменің ашылып және мұндай орталықтардың өңірлерде құрылып, отбасылар үшін қолжетімді болуы ерекше маңызға ие екенін атап өтті.
Талдықорған қаласының тұрғыны Салтанат Бүйенбаеваның айтуынша, 6 жасар қызы Алина бірнеше жылдан бері сабаққа қатысып келеді.
– Менің қызым 3 жылдан бері осындай мекемеде оқиды. Сенсорлық интеграция кабинетіне, логопед және дефектологтың сабақтарына, сондай-ақ, бейімделген дене шынықтыру мен тұзды шахтаға барады. Жақсы нәтиже бар. Бұрын алыс жүруге тура келетін, енді орталық үй жанынан ашылды. Бұл біз үшін өте ыңғайлы, – дейді Салтанат Бүйенбаева.
Айта кетейік, «Tanym» орталығы – «Таным – көкжиегіңді кеңейтуді» мақсат тұтады!» Мұнда балалардың назарын, зердесін, сөйлеуі мен ойлауын дамытуға ерекше көңіл бөледі. Ал жаңа орталықтың ашылуы ерекше білім беру қажеттіліктері бар балаларға сапалы әрі қолжетімді көмек көрсету мүмкіндіктерін кеңейтуге жағдай жасайды және бұл өңірде инклюзивті білім беруді дамытудағы тағы бір қадам саналады.
Айгүл БАЙБОСЫНОВА
