Қоғамның дамуы мен өркендеуі ең алдымен заң мен тәртіптің сақталуына байланысты. Заң – мемлекеттегі барлық азамат үшін ортақ ереже, ал тәртіп – сол заңдарды құрметтеп, орындаудың көрінісі. Сондықтан заң мен тәртіп бар жерде тұрақтылық, қауіпсіздік және әділеттілік орнайды.
Әрбір азамат заңды білуге және оны сақтауға міндетті. Бұл – тек құқықтық талап қана емес, азаматтық жауапкершілік. Заң мен тәртіптің сақталуы мемлекет пен халық арасындағы сенімді арттырады. Әділ заңдар мен олардың дұрыс орындалуы азаматтардың мемлекетке деген құрметін күшейтеді. Ал, керісінше жағдайда, яғни заң ескерілмесе немесе тәртіп бұзылса, қоғамда тұрақсыздық пен сенімсіздік пайда болады. Осы мәселені студенттердің бойына сіңіру мақсатында әл-Фараби атындағы Қазақ ұлттық университеті химия және химиялық технология факультетінің жалпы және бейорганикалық химия кафедрасының ұстаздары оқу орындарында ішкі тәртіп ережелерін сақтау, студенттердің заңға құрметін қалыптастыру, олардың білім алып қана қоймай, заң мен тәртіпті сақтау мәдениетін меңгеруін қадағалау жұмыстарын жүйелі түрде жүргізеді. Қазіргі қоғамда студент жастар – елдің болашағын қалыптастыратын негізгі күштердің бірі.
Студенттік кезең – тұлғаның қалыптасу уақыты. Осы уақытта жастар өз құқықтары мен міндеттерін түсініп, қоғамдағы орнын айқындайды. Заң мен тәртіпке бағыну арқылы студенттер өздерінің азаматтық позициясын нығайтып, жауапкершілік сезімін арттырады. Бұл қасиеттер болашақта кәсіби қызметте де, қоғамдық өмірде де үлкен рөл атқарады.
Сабаққа уақытында қатысу, академиялық адалдықты сақтау, оқу орнының мүлкіне ұқыпты қарау – мұның барлығы тәртіптіліктің белгілері. Әсіресе, емтихан кезінде әділ болу, плагиаттан аулақ болу студенттің шынайы білімін көрсетеді және оның адамгершілік деңгейін айқындайды. Сонымен қатар, студенттер қоғамдық орындарда өзін дұрыс ұстап, құқықбұзушылықтардан аулақ болуы тиіс. Заңды бұзу тек жеке адамға ғана емес, бүкіл қоғамға зиян келтіреді. Ал заңды құрметтеу – өзгелерге үлгі болудың белгісі.
Егер бүгінгі жастар заң мен тәртіпті сақтауды өмірлік қағидасына айналдырса, болашақта әділ, мәдениетті және дамыған қоғам қалыптасатыны сөзсіз. Студенттердің заң мен тәртіпке бағынуы – елдің тұрақты дамуының кепілі. Саналы, тәртіпті әрі жауапты жастар – жарқын болашақтың негізі.
Заң үстемдігін қамтамасыз ету – әрбір мемлекеттің басты міндеттерінің бірі. Бұл бағытта құқық қорғау органдарының жұмысы ерекше маңызды. Дегенмен, тәртіп тек мемлекеттік бақылаумен ғана емес, әр адамның ішкі мәдениеті мен санасына да байланысты. Яғни, заңды сақтау – сыртқы міндет қана емес, ішкі тәртіптің көрінісі.
Л. Бейсембаева,
О. Пономаренко,
әл-Фараби атындағы Қазақ ұлттық университеті
химия және химиялық технология факультетінің жалпы және
бейорганикалық химия кафедрасының доценттері
