Қазақстан Республикасының Өнеркәсіп және құрылыс министрі Ерсайын Нағаспаев Cove Kaz Capital Group LLC бас директоры Доминик Хитонмен кездесу өткізді. Маңызды келіссөздерге «Тау–Кен Самұрық «ҰТК» АҚ басқарма төрағасы Нариман Абсаметов те қатысты, – деп хабарлайды 7-su.kz ақпараттық порталыне сілтеме жасап.
Министрліктің баспасөз қызметі кездесу барысында тараптар тау–кен саласындағы екіжақты ынтымақтастықтың қазіргі жай–күйі мен оны келешекте дамыту мәселелерін талқыланғанын мәлімдеді. Қазақстан мен АҚШ арасындағы серіктестіктің стратегиялық маңызы жоғары. Америкалық компаниялардың ел экономикасының дамуына қосып келе жатқан үлесі ерекше атап өтілді. Әсіресе бірлескен инвестициялық жобаларды іске асыру мәселелеріне басымдық берілді. Министр өзара тиімді байланысты одан әрі нығайтуға және жаңа бастамаларды жүзеге асыруға мүдделі екенін жеткізді.
2025 жылғы қарашада «Тау–Кен Самұрық «ҰТК» АҚ мен Cove Capital компаниясы Қарағанды облысы аумағындағы әлемдегі ең ірі кен орындарының қатарына кіретін Солтүстік Қатпар мен Жоғарғы Қайрақтыны бірлесіп игеру туралы келісім жасасқан еді. Аталған құжат бойынша инвестор екі байыту фабрикасы мен бір металлургиялық зауыттың құрылысына 1,1 млрд АҚШ доллары көлемінде инвестиция салуға міндеттеледі.
Жоба толық іске қосылғанда жұмыспен қамтылғандардың жалпы саны шамамен 1 мың адамды құрайды. Мұнда қазақстандық мамандарды жұмысқа қабылдауға басымдық беріледі. Келісімдегі стратегиялық маңызды талаптардың бірі – шикізат пен жартылай дайын өнімдерді экспорттауға тыйым салу. Өндіріс толықтай терең қайта өңдеуге бағытталып, ел ішінде дайын өнім шығаруды көздейді.
Мұндай ауқымды жобалар елдің индустриялық әлеуетін арттырып, жаңа технологиялардың келуіне жол ашады.
