Қазақстандық білім беру саласы халықаралық деңгейде үлкен жетістікке жетті. Алматылық ұстаз Татьяна Белоусова беделді Global Teacher Prize байқауының финалисі атанды. Мемлекет басшысы Қасым-Жомарт Тоқаев педагогті осы айтулы табысымен жеке құттықтады, – деп хабарлайды 7-su.kz ақпараттық порталы.
Президент Алматы қаласындағы №95 мектеп-лицейі химия пәнінің мұғалімі Татьяна Белоусованы Global Teacher Prize халықаралық байқауының қорытындысы бойынша әлемдегі ең үздік 50 педагогтің қатарына енуіне орай құттықтады.
«Бұл жоғары баға – Сіздің өскелең ұрпаққа тағылымды тәрбие мен озық білім беру ісіне сіңірген ұзақ жылғы еңбегіңіздің жемісі. Біздің мақсатымыз – зияткер ұлтқа айналу. Сондықтан мемлекет әрдайым мұғалімдердің мәртебесін көтеріп, оларды жан-жақты қолдайды», – деді Қасым-Жомарт Тоқаев.
